Charter Document - 07380028
| Charter Number: | 07380028 |
|---|---|
| Cartulary Title: | Carte Prioratus Insule de May |
| Charter Language: | Latin |
| Charter Origin: | Religious |
| Charter Type(s): | Final Concord |
| Date: | 1260 |
| Date type: | Internal, A.D. |
| Resource Link(s): |
People of Medieval Scotland |
Charter:
Hec est finalis concordia anno gracie MCC sexagesimo facta inter religiosos uiros priorem et monachos de May ex parte vna et dominum Johannem de Dundemore militem ex altera videlicet quod cum controuersia mota esset inter eosdem super quadam terra que uocatur Turbrech in Fyf post multas altercaciones inter partes habitas lis in hunc modum conquieuit scilicet quod dictus dominus Johannes totam dictam terram de Turbrech per suas rectas et antiquas diuisas dictis priori et monachis dimisit quietam clamauit et presenti scripto in liberam et perpetuam elemosinam pro anima sua et animabus antecessorum et successorum suorum confirmauit Pro hac dimissione quieta clamancia et confirmacione prefati prior et monachi concesserunt dicto domino Johanni et heredibus suis unum monachum diuina celebrantem in capella beate Marie uirginis in insula de May pro anima sua et animabus antecessorum et successorum suorum in perpetuum concesserunt etiam eidem domino Johanni et heredibus suis singulis annis dimidiam marcam argenti uel sexaginta mulewellos ad duos anni terminos scilicet ad pentecosten unam medietatem et ad festum sancti Martini in hieme aliam medietatem ita quod sit in opcione dictorum prioris et monachorum dictam dimidiam marcam siue dictos mulewellos suis terminis soluere concesserunt insuper dicto Johanni et heredibus suis unam lampadem uitream in ecclesia de Syreis et ad sustentacionem eiusdem lampadis duos galones olei uel duodecim denarios per annum inperpetuum Si autem contingat dictos priorem et monachos uel aliquem successorum suorum prescriptam formam pacis non obseruare uel in aliquo infringere competat ex tunc dicto Johanni uel heredibus suis actio in dicta terra que ante tempus istius pacis inite eidem competebat Et ad huius rei fidem et securitatem parti huius scripti in modum cyrograffi confecti penes sepe dictum dominum Johannem residenti sigillum domini Hugonis tunc prioris de May appositum est et parti penes dictos priorem et monachos residenti sigillum dicti domini Johannis est appensum