Charter Document - 07370447

Johannes miseratione divina tituli Sancti Stephani in Celio monte presbyter cardinalis apostolice sedis legatus Venerabilibus in Christo fratribus universis episcopis in regno Scocie constitutis [] Cum igitur ecclesia illa Kalchoensis de concessione episcoporum et confirmatione Romanorum pontificum quasdam ecclesias in parochiis vestris habeat in usus proprios deputatas quarum proventus in sustentationem fratrum provisionem pauperum et receptionem hospitum fideliter cognovimus erogari ne per abusiones et per inmoderatas et illicitas exacciones aliquorum ecclesia prefata detrimentum sustineat aliquod vel jacturam presentis pagine constitucione sancimus et illis et successoribus suis in perpetuum indulgemus ut quociens episcopi in quorum dioecesi monachi Kalchoenses ecclesias parochiales habent hospicium annue visitationis in ecclesiis eorum recipiunt non teneantur eos cum majori numero eveccionis recipere nisi cum eo qui in Lateranensi concilio fore dinoscitur institutus Necessaria quoque tam in cibis adveniencium quam in pabulis jumentorum per ministros et servientes monachorum honeste volumus ministrari nec volumus quod ex optentu alicujus consuetudinis per alienos ministros necessaria ministrentur nec per effusionis et abusionis vicium ecclesie ledantur et inde detrimentum sentiant vel jacturam unde relevacionem et subsidium speraverunt Hospites quoque quasi sub gratia episcopalis hospicii vel officii nulli admittantur nisi quos qui procurationem exhibent duxerint admittendos Illas autem ecclesias ad procurationem exhibendam dioecesano episcopo teneri volumus que xxx marcarum redditu gaudere noscuntur Alie autem que minorum sunt redituum predicte summe consideracione habita aliis ecclesiis conjungantur ad exhibitionis onera peragenda Decedentibus vero vicariis ecclesiarum ipsorum monachorum auctoritate eis legacionis qua fungimur indulgemus ut possint ad eas vicarios idoneos presentare nec licitum sit vobis eorum presentationes nisi criminosi sint vel alias minus idonei pro voluntate vestra differre quod si aliquis ex vobis dioecesanus episcopus pro sue voluntatis arbitrio absque rationabili causa presentationes ipsorum admittere noluerit vel distulerit fas sit Kalchoensibus proventus et obventiones medii temporis recipere in usus proprios et sustentationem pauperum con vertendos Sane si clerici vel vicarii ecclesiarum ipsorum decedentes annuum redditum vel partem illius anni qui secundum generalem terre consuetudinem in eorum usus solet exigi et expendi eis legaverint in testamento ultime voluntatis hujusmodi voluntatem nolumus per aliquem vestrum vel aliorum infringi sed potius ea tanquam pia et legitima cum omni integritate servetur Preterea de regimine parochie ipsius Kalkoensis ecclesie statuimus ut per abbates dicti monasterii omnis ejus administratio regatur et disponatur inperpetuum sicut hactenus observatum est et illud auctoritate legacionis nostre qua fungimur confirmamus Indulgemus quoque eis ut licitum sit eis eos qui in aliquem de monachis suis vel conversis manus violentas injecerint publice denunciare excommunicationis vinculo enodatas Eadem quoque auctoritate eis duximus indulgendum ut in manifestos fures seu publicos inuasores rerum suarum et malefactores ecclesie sue nominatim singulis diebus dominicis et festis accensis candelis et pulsatis campanis excommunicationis sententiam promulgare Quam etiam liceat eis singulis annis in cena domini et in assumptione beate Marie publice innovare Licitum etiam sit eis in causis ecclesie sue monachos seu conversos eorum testes inducere ad perhibendum testimonium veritati ne pro defectu testium jus eorum valeat deperire Nulli ergo omnino hominum liceat hanc paginam nostre constitucionis indulgencie et confirmacionis infringere si quis autem hoc attemptare presumpserit indignationem omnipotentis Dei et beatorum Petri et Pauli apostolorum ejus domini pape et nostram se noverit incursurum