Charter Document - 07370387
| Charter Number: | 07370387 |
|---|---|
| Cartulary Title: | Liber Sancte Marie de Calchou |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 1165 - 1171 |
| Date type: | Assigned |
| Resource Link(s): |
People of Medieval Scotland |
Charter:
W[illelmus] Rex Scottorum Justicie sue et vicecomiti suo et prepositis suis de Rokesburg salutem Sciatis me concessisse Deo et Ecclesie Sancte Marie de Kelch et monachis ibidem Deo seruientibus pro anima Comitis Henrici patris mei et pro animabus antecessorum meorum et pro salute anime mee ut homines sui qui in Kelchou sunt manentes omnibus diebus septimane excepto die statuto fori mei de Rokesburg licenciam habeant emendi in uilla sua focale et materiem et annonam et transeuntes licenciam habeant eis ista uendendi Habeant etiam homines sui licenciam uendendi in fenestris suis panem et ceruisiam et carnem Si autem piscem in propriis suis quadrigis uel equis attulerint et inde uendere uoluerint in fenestris suis liceat eis uendere Quadrige autem aliunde uenientes et perinde transeuntes neque ibi exhonorent neque ibi uendant set ad forum meum ueniant Die autem fori mei statuti de Rokesburg non liceat eis quicquam emere in uilla sua set ad forum meum ueniant et ibi cum aliis burgensibus meis que uoluerint emant per rectas consuetudines suas Testibus Engelramo Episcopo de Glasgu Nicolao Cancellario Willelmo de Haia Roberto de Chartres Apud Pebbles