Charter Document - 07330054

Urbanus Episcopus servus servorum Dei venerabili fratri Glasguensi Episcopo salutem et Apostolicam benedictionem Quanto plenius de tua honestate confidimus tanto facilius tibi concedimus que salva possumus consciencia indulgere Inde est quod precibus tuis inducti auctoritate Apostolica tibi concedimus ut si quisquam ecclesiam vel beneficium ecclesiasticum infra parochiam tuam forte invaserit vel alio quocunque modo propria temeritate ingressus fuerit et ut in detentatione impune perduret vocem appellationis emiserit fas tibi sit talem nullius appellatione obstante vinculo excommunicationis astringere eumque ab ecclesia aut beneficio quod invaserit alienum reddere Preterea si aliqui clericorum aut parochianorum tuorum a tuo examine vel judicio appellaverint et tempus diffisum prefixerint liceat tibi appellantium facultate pensata competentis appellationis terminum coartare infra quem si prosequi appellationem omiserint ex tunc in negotio servato juris ordine appellatione remota procedas Ad hec cum persone ecclesiastice Judeis vel feneratoribus aliis ecclesias suas vel beneficia ecclesiastica pro pecunia quam mutuo accipiunt obligare presumunt ne hoc ulterius fiat publice interdicas Si qui autem prohibitionis tue fuerint contemptores liceat tibi eos ecclesiis et supradictis beneficiis spoliare nisi infra duorum mensium spatium emendaverint Nulli ergo omnino hominum liceat hanc paginam nostre constitutionis infringere vel ei ausu temerario contraire Siquis autem hoc attemptare presumpserit indignationem omnipotentis Dei et beatorum Petri et Pauli apostolorum Ejus se noverit incursurum Data Verone iiii Nonas Junii