Charter Document - 07330038
| Charter Number: | 07330038 |
|---|---|
| Cartulary Title: | Registrum episcopatus Glasguensis |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1176 |
| Date type: | Assigned |
| Resource Link(s): |
People of Medieval Scotland |
Charter:
Alexander Episcopus servus servorum Dei venerabilibus fratribus Episcopis Scotia salutem et Apostolicam benedictionem Super anxietatibus et angustiis quas sustinere noscimini paterna vobis affectione compatimur et plurimum condolemus et super hiis omnem quam cum Deo possumus parati sumus auxilium impertiri Sane gravat vos admodum gravat et nos quod carissimus in Christo filius noster Henricus illustris Anglorum Rex vos jurare coegit ut obedietis Anglicane Ecclesie cum hoc injuriam Dei et contemptum nostrum respiciat et in depressionem ecclesiastice libertatis quam non est alicujus Regis vel principis de Ecclesiis vel personis ecclesiasticis ordinare Nos autem sustinere nolentes libertatem vestram imminui venerabili fratri nostro Eboracensi Archiepiscopo Apostolice sedis legato districte precepimus ut in vos jus metropoliticam non exerceat donec sub examine Romani pontificis cognoscatur utrum sibi debeatis metropolitico jure subesse et memoratum Regem de receptione predictorum juramentorum prout debuimus redarguentes ipsum attente monuimus ut vos ad prestandam sibi obedientiam non compellat nec ad hoc suum assensum tribuat vel favorem Mandamus itaque fraternitati vestre atque precipimus quatinus nemini nisi Romano pontifici juramentorum ipsorum obtentu vel alia de causa metropolitico jure obedire temptetis donec in presentia nostra vel catholici successoris nostri si prefatus Archiepiscopus super hoc in causam trahere vos voluerit controversia inter vos et ipsum fine debito terminetur Datum Anagnie iii Kalendas Augusti