Charter Document - 07330032

Alexander Episcopus Servus Servorum Dei venerabili fratri Jocelino Glasguensi Episcopo eiusque successoribus canonice substituendis in perpetuum Cum ex iniuncto nobis Apostolatus officio quo cunctis Christi fidelibus ex superni dispositione arbitrij prominemus singulorum paci et tranquillitati debeamus intendere presertim pro illorum quiete oportet nos esse sollicitos qui pastorali dignitate sunt prediti et ad officium pontificale promoti Ea propter uenerabilis in Christo frater tuis iustis postulationibus clementer annuentes specialem filiam nostram nullo mediante Glasguensem Ecclesiam cui auctore Domino preesse dinosceris sub beati Petri et nostra protectione suscipimus et presentis scripti priuilegio communimus statuentes ut quascumque possessiones quecumque bona eadem Ecclesia in presentiarum iuste et canonice possidet aut in futurum concessione Pontificum largicione Regum uel principum oblatione fidelium seu aliis iustis modis prestante Domino poterit adipisci firme tibi tuisque successoribus et illibata permaneant In quibus hec propriis duximus exprimenda uocabulis Glasgu Guuan Pertheic Inienchedin Rodera Casteltarras Stubbeho Dalmurinech Conclud Trauereni Hirdemanestun Lillesclif Alnecrumbe Gillemorestun Axekirche cum omnibus earundem terrarum ecclesiis capellis et ceteris pertinentiis ecclesiam de Merebotle ecclesiam de ueteri Rochesburc ecclesiam de Trauercuer ecclesiam de Pebbles ecclesiam de Karnewic ecclesiam de Mortheuic ecclesiam de Atstanesdene ecclesiam de Wiltona ecclesiam de Aschachirche ecclesiam de Lachoruar et quicquid iuris tui est in Theuidale Tuedale et Cludesdale et Auandesdale et Driuesdale et Leuenaichs et in Cuil et en Karreich et in Galweith et Laodonia cum omnibus predictarum ecclesiarum capellis et aliis pertinentiis et cum aliis terris et pertinentiis ecclesiis et capellis sicut in priuilegiis nostris et Romanorum Pontificum continetur et cartis Regum Scotie et ceterorum donatorum confirmatur Paci quoque et tranquillitati tue paterna sollicitudine prouidentes sancimus et auctoritate Apostolica prohibemus ne aliqua ecclesiastica secularisque persona terminos parochie tue diminuere uel perturbare audeat nec infra eosdem terminos ius episcopale uel parochiale exercere presumat Preterea donationes prebendarum Ecclesie tue sicut Jocelino antecessor tuus habuit et tu nunc habere dinosceris tibi auctoritate Apostolica confirmamus prohibentes ne aliqua persona secularis prebendas personis in Ecclesia tua canonice concessas inuadere uel illicite detinere audeat neque decedentibus personis ius sibi successionis aliquod uendicet Nihilominus etiam canonice disponendi de rebus ad Ecclesiam tuam pertinentibus liberam et plenam sicut conuenit habeas facultatem Libertates quoque et immunitates a Regibus Scottorum Ecclesie tue indultas et rationabiles consuetudines redditus etiam et seruitia siue alia ad Ecclesiam tuam pertinentia tibi auctoritate Apostolica confirmamus Decernimus ergo [] ut in aliis priuilegiis continetur Si qua igitur in futurum ecclesiastica secularisque persona hanc nostre constitutionis paginam sciens contra eam temere uenire temptauerit secundo tercioue commonita nisi reatum suum digna satisfaccione correxerit potestatis honorisque sui dignitate careat reamque se Diuino iudicio existere de perpetrata iniquitate cognoscat et a sacratissimo Corpore ac Sanguine Dei et Domini Redemptoris nostri Iesu Christi aliena fiat atque in extremo examine districte ultioni subiaceat Cunctis autem eidem loco sua iura seruantibus sit pax Domini nostri Iesu Christi quatinus et hic fructum bone accionis percipiant et apud districtum Iudicem premia eterne pacis inueniant Amen Ego Alexander Catholice Ecclesie Episcopus Subscripsi Ego Uubaldus Hostiensis Episcopus Subscripsi Ego Bernardus Portuensis et Sancte Ruffine Episcopus Subscripsi Ego Gualterius Albanensis Episcopus Subscripsi Ego Iohes presbiter Cardinalis Sanctorum Iohannis et Pauli titulo Parnachii Subscripsi Ego Guillelmus titulo Sancti Petri ad Uincula presbiter Cardinalis Subscripsi Ego Boso presbiter Cardinalis Sancte Pudentiane titulo Pastoris Ego Manfredus presbiter Cardinalis titulo Sancte Cecilie Subscripsi Ego Petrus presbiter Cardinalis titulo Sancte Susanne Subscripsi Ego Arditio diaconus Cardinalis Sancti Theodori Subscripsi Ego Cinthius diaconus Cardinalis Sancti Adriani Subscripsi Ego Vitellius diaconus Cardinalis Sanctorum Sergii et Bachi Subscripsi Ego Hugo Sancti Angeli diaconus Cardinalis Ego Laborans diaconus Cardinalis Sancte Marie in Porticu Subscripsi Data Ferentini per manum Gratianj Sancte Romane Ecclesie sub diaconi et notarij ii kalendas Maij Indictione vj Incarnacionis Dominice anno MCLXXIIIJ Pontificatus domini Alexandri Pape iij anno xvj