Charter Document - 07330030

Willelmus Dei gratia Rex Scottorum Episcopis Abbatibus Comitibus Baronibus Justiciis vicecomitibus prepositis ministris et omnibus probis hominibus tocius terre sue clericis et laicis salutem Sciant presentes et futuri me concessisse et hac carta mea confirmasse Deo et ecclesie Glasguensi et Ormo de Askirke et heredibus suis de me et heredibus meis in feodo et hereditate ut predictus Ormus et heredes sui et eorum homines de Askirke habeant pasturam suam uersus forestam meam et in foresta ita bene et plenaria sicut Malcolmus Rex frater meus illam eis perambulare fecit et sicut ego per Ricardum de Moreuill constabularium meum et alios probos homines meos qui predicte perambulationi interfuerunt illam perambulacionem eis feci recitare scilicet a Staniford usque ad Crucem et a Cruce usque ad magnam alnum iuxta Turberam et inde usque ad Illieslade et inde usque ad paruum Riuulum in orientali parte de Huntleie et de illo Riuulo sursum usque in Riuulum de Akermere et de sic sursum usque ad Wenelaciam Ricardi Cumin et sic deinde sursum ad sicum quod est propinquius sub Todholerig et sic ab illo sico usque ad sicum quod vadit in Riuulum de Langhope et deinde sicut diuisa vadit in occidentali parte de Lepes inter Askirke et Whiteslade in Alne Concedo etiam eis ut ubique infra sepem que facta fuit circa eorum Wainagia die qua hec carta facta fuit scilicet Dominica proxima ante festum Simonis et Jude proximum postquam Rex Francorum primo venit in Angliam ad Sanctum Thomam liceat eis arare et seminare et Waynagia facere et prohibeo firmiter ne quis eis de predicta pastura siue waynagio iniuriam aut aliquam violenciam inferat Testibus Dauid fratre meo Comite Waldeuo Ricardo de Moreuill constabulario Roberto de Quinci Waltero de Berk Camerario Alano Dapifero Waltero Olifard Hugone Ridel Roberto de Berk Willelmo de Haia apud Selsch