Charter Document - 07330028

Alexander Episcopus servus servorum Dei dilectis filiis Salomoni decano et canonicis Glasguensibus tam presentibus quam futuris canonice substituendis in perpetuum Quociens illud a nobis petitur quod religioni et honestati convenire dinoscit animo nos decet libenti concedere et petencium desideriis congruum suffragium impertiri Ea propter dilecti in Domino filii vestris justis postulationibus clementer annuimus et Glasguensem ecclesiam in qua divino estis obsequio mancipati sub beati Petri et nostra proteccione suscipimus et presentis scripti privilegio communimus Statuentes ut quascunque possessiones quecunque bona aut in presentiarum juste et canonice possidetis aut in futurum concessione pontificum largicione regum vel principum oblacione fidelium seu aliis justis modis prestante Domino poteritis adipisci firma vobis vestrisque successoribus et illibata permaneant In quibus hec propriis duximus exprimenda vocabulis parochiam de Glasgu cum omni integritate juris et libertatis sue et decimis prout date fuerunt tempore Johannis Episcopi et cum incremento carrucate terre juxta Rinfriu quam bone memorie Herbertus quondam episcopus vester ad augmentum ipsius prebende adjecit ecclesiam de Guuan cum toto Perdehic ecclesiam de Renfriu cum decimis et consuetudinibus quas tenuit a tempore regis David unam carucatam terre in Glasgu cum ecclesia de Cadiho et ejus pertinentiis sicut in tempore regis David Barlannark cum Budlornac quod Herbertus episcopus ad augmentum ipsius prebende adjecit Prebendam quam idem episcopus instituit de una carrucata terre in Glasgu mensurata et de septima parte beneficiorum ad commune proveniencium que prius inter sex canonicos dividebantur Prebendam quam Johannes episcopus instituit de decimis firmarum tam in caseis quam farinis et in aliis que veniunt in cellarium episcopi et de decima octavi denarii de placitis regis Paci quoque et tranquillitati ecclesie vestre paterna sollicitudine providere volentes presenti decreto sancimus ut infra territoria de Glasgu de Guvan de Perdehic de villa Mineschadin nullus dominium advocaciam vel conductum aut quodlibet jus sibi vindicare audeat nisi vos et episcopus vester sicut hactenus observatum fuisse dinoscitur Obeunte vero episcopo ecclesie vestre nullus ibi qualibet subrepcione astucia seu violencia preponatur nisi quem decanus ecclesie vestre communi consilio capituli vestri vel partis sanioris et consilio religiosorum virorum vestre civitatis secundum Dei timorem et statuta canonum providerit eligendum Nulli etiam ecclesiastice secularive persone liceat electionem quam concorditer et canonice feceritis temeritate qualibet impedire Preterea rationabiles consuetudines et libertates quas bone memorie Herbertus quondam episcopus vester secundum morem Sarisberiensis ecclesie in ecclesia vestra induxit et scripto proprio confirmavit vobis auctoritate apostolica confirmamus Decernimus ergo ut nulli omnino hominum liceat vos vel prefatam ecclesiam vestram temere perturbare aut possessiones vestras auferre vel ablatas retinere minuere seu quibuslibet vexationibus fatigare sed omnia integra et illibata serventur eorum pro quorum gubernacione ac sustentacione concessa sunt usibus omnimodis profutura Salva sedis apostolice auctoritate et episcopi vestri canonica reverencia Siqua igitur in futurum ecclesiastica secularisve persona hanc nostre constitucionis paginam sciens contra eam temere venire temptaverit secundo tertiove commonita nisi reatum suum digna satisfactione correxerit potestatis honorisque sui dignitate careat reamque se divino iudicio existere de perpetua iniquitate cognoscat et a sacratissimo corpore ac sanguine dei et domini redemptoris nostri et Jesu Christi aliena fiat atque in extremo examine districte ulcioni subiaciat Cunctis autem eidem loco sua iura seruantibus sit pax domini nostri Jesu Christi quatinus et hic fructum bone actionis percipiant et apud districtum iudicium premia eterne pacis inueniant Amen Amen Ego Alex[ander] catholice ecclesie episcopus Signum Ego Hubaldus Hostiensis episcopus Signum Ego Gualterius Albanensis episcopus Signum Ego Guillelmus cardinalis tituli Signum Petri ad Vincula Signum Ego Boso presbiter cardinalis Sancte Pudentie tituli Pastoris Signum Ego Johannes presbiter cardinalis tituli Sancti Marci Signum Ego Oddo diaconis cardinalis Sancti Nicholai in Carcere Tulliano Signum Ego Cinthyus diaconis cardinalis Sancti Adriani Signum Ego Manfredus diaconus cardinalis Sancti Georgii ad Velum Aureum Signum Ego Hugo diaconis cardinalis Sancti Eustachii juxta templum Agrippe Signum Ego Vitellus diaconis cardinalis Sanctus Sergii et Bachi Signum Ego Petrus diaconis cardinalis Sancte Marie in Aquiro Signum Data Signie per manum Gratiani sancte Romane ecclesie subdiaconi et notarii viii Kalendas Aprilis Indictione vi Incarnacionis dominice anno MCLXXII pontificatus vero domini Alexandri Pape iii Anno xiiij