Charter Document - 07330023

Alexander Episcopus servus servorum Dei dilectis filiis S[alomon] decano et capitulo Glasguensis ecclesie Salutem et apostolicam benedictionem Cum ex commisso nobis apostolatus officio pro universarum debeamus ecclesiarum statu satagere in conservandis earum justitiis et consuetudinibus non debemus negligentes vel tepidi apparere ne ipsis cura vel providentia apostolice sedes videatur deesse vel nos de negligentia injuncte nobis sollicitudinis merito culpari possimus Accepimus autem vos communi consilio et salubri providentia statuisse ut prebenda defuncti canonici per integrum annum pauperibus erogetur aut debita ejus pro re honesta contracta creditoribus persolvantur Quam itaque constitutionem ratam et firmam habentes eam auctoritate apostolica confirmamus et presentis scripti patrocinio communimus arcius inhibentes ne cui liceat vobis vel hiis qui in terris vestris habitant novas vel indebitas actiones aut consuetudines imponere Sed omnia predia vestra in ea immunitate et libertate de cetero habeatis et teneatis in qua a tempore David regis noscimini habuisse Preterea omnes antiquas et rationabiles consuetudines quas idem rex David vel Johannes quondam Glasguensis episcopus in ecclesia vestra induxerunt firmas et inconcussas manere sanccimus et auctoritatis nostre munimine roboramus Discernimus ergo ut nulli omnino hominum liceat hanc paginam nostre confirmationis et constitutionis infringere vel ei aliquatenus contraire Si quis autem hoc attemptare presumpserit indignationem omnipotentis Dei et beatorum Petri et Pauli apostolorum ejus se noverit incursurum Data Ferentini anno pontificatus nostri ii Nonas Marcii