Charter Document - 07310342

Robertus Dei gracia rex Scottorum venerabili in Christo patri Willelmo eadem gracia Sancti Andree episcopo salutem Cum pium existat ac racionabile lesis ecclesiis subuenire monasteriumque nostrum de Dunfermelyn vestre dioecesis turbatum sit multipliciter ac in rebus exinanitum per guerrarum diutinarum ineuitabiles euentus paupertati et rerum spoliacioni eiusdem regio affectu compacientes vt tenemur eidem monasterio ac monachis ibidem Deo seruientibus et inperpetuum seruituris in hospitalitatis augmentum ecclesiam de Kynros cum capella de Vrwell propter honorem sepulture regum predecessorum nostrorum qui ibidem sepeliuntur ac sepulture nostre quam apud ipsos specialiter elegimus diuine concessimus intuitu caritatis Vnde cum inter cetera pastoralis officii precipuum existat fidelium animos ad opera excitare caritatis et summa sit racio que pro religione facit paternitatem vestram affectuose requirimus et attente rogamus quatinus ea que circa premissa pro affectu regio deuote sunt inchoata considerantes velitis supplere et perficere in omnibus que spectant ad officium vestrum pastorale dictam ecclesiam et capellam vna cum fructibus ad easdem pertinentibus eisdem religiosis in proprios vsus libere concedendo ita quod rectore eiusdem ecclesie qui nunc est cedente vel decedente prefati religiosi ac successores eorundem vti valeant in perpetuum fructibus per vos sibi concessis caritatis intuitu et precum nostrarum interuentu Datum apud Dunfermelyn xvi die mensis Nouembris anno regni nostri nono