Charter Document - 07301277

Innocentius episcopus servus servorum Dei dilectis filijs abbati Premonstratensi ejusque coabbatibus et conventibus universis Premonstratensis ordinis salutem et apostolicam benedictionem Virtute perspicuos sacri vestri ordinis professores qui contemplacioni celestium serventur invigilant et pie vite studio sine intermissione desudant decet per apostolice suspectionis auxilium sic provide dirigi ac solicite confoveri ut alicujus pretextu calumpnie nullum interne pacis excidium nullum religiosi status perferat detrimentum sed in his robur et vigorem habeant per que circa cultum divini nominis devotis et quietis mentibus invalescant sane in privilegio sedis apostolice ordini vestro concesso perspeximus contineri quod cum aliqua ecclesiarum vestrarum abbate proprio fuerit destituta vel cum ibi abbatis electio regulariter non fuerit celebrata sub Patris abbatis potestate ac disposicione consistat et cum ejusdem consilio qui eligendus fuerit a canonicis eligatur electo autem fratres ecclesie statim obedienciam promittant qui non quasi absolutus a potestate Patris abbatis vel ordinis sui archiepiscopo vel episcopo in cujus dioecesi fuerit presentetur plenitudinem ab eo officij percepturus ita tamen quod post factam archiepiscopo vel episcopo suo professionem occasione illa non transgrediatur constitutiones ordinis sui nec in aliquo ejus prevaricator existat Si quis etiam ex vobis electus canonice in abbatem dioecesano episcopo semel et iterum per abbates vestri ordinis presentatus benedictio nem ab eo non poterit optinere ne ecclesia ad quam vocatus est destituta consilio periclitetur officio et loco abbatis plenaria secundum ordinem fungatur in ea tam in exterioribus providendis quam interioribus corrigendis donec aut interventu generalis capituli vestri aut ex precepto Romani pontificis sive metropolitani benedictionem suam optineat Cum autem super hijs verbis et intellectu ipsorum sicut tu fili Abbas coram nobis et fratribus nostris retulisti humiliter a quibusdam ex vobis mens dubia et cor fluctuans haberetur duxistis propter hoc ad sedis apostolice providenciam recurrendum suppliciter postulantes ut ipsa in hac parte pro quiete conscienciarum vestrarum et tranquillitate ordinis providere vobis per declarationis remedium dignaretur nos ita super hoc dictorum fratrum nostrorum communicato consilio sic duximus declarandum scilicet quod electus in abbatem post prestitam sibi juxta tenorem ipsius privilegij a fratribus obedienciam dioecesano per supradictos presentetur abbates ab ipso sine examinatione monasterij curam et benedictionis gratiam libere percepturus in quibus officij plenitudinem intelligimus contineri presertim cum de intentione predecessorum nostrorum qui ordini vestro predictum privilegium concesserunt non videatur fuisse quod examinatus a dioecesano presentari sibi deberet electus prout ex eo patet quod si post factam examinationem benedictionem negari contingeret supervacuum videretur obedientiam a fratribus prestitam extitisse ac indecenter sibi fuisse concessum quod benedictione negata plene fungeretur abbatis loco et officio cum per hoc judex et auctor in causa sua fieri videretur sed si juste vel injuste dioecesanus benedictionem hujusmodi denegaret esset aliquibus hujusmodi cause discussio committenda per hanc autem declarationem nullum vobis et ordini vestro jus de novo adquiri volumus nec alicui prejudicium generari Nulli ergo omnino hominum liceat hanc paginam nostre declarationis infringere vel ei ausu temerario contraire si quis autem hoc attemptare presumpserit indignacionem omnipotentis Dei et beatorum Petri et Pauli apostolorum ejus se noverit incursurum Datum Lugduni vi idus Octobris pontificatus nostri anno quarto