Charter Document - 07300293

Universis sancte matris ecclesie filijs presentes literas visuris vel audituris Willelmus de Lambertoun permissione divina sancti Andree episcopus salutem in Domino Noveritis nos literas bone memorie domini Gamelini predecessoris nostri vidisse et legisse tenorem qui sequitur continentes una cum plenaria capituli sancti Andree ac domini Willelmi Freser similiter predecessoris nostri confirmatione Universis Christi fidelibus presentes literas visuris vel audituris Gamelinus miseratione divina ecclesie sancti Andree minister humilis salutem eternam in Domino Noverit universitas vestra quod de voluntate et consensu dilectorum filiorum abbatis et conventus de Driburgh ordinis Premonstratensis talis per nos facta est ordinatio vicariarum parochialium ecclesiarum ipsorum abbatis et conventus videlicet quod vicarius secularis qui in ecclesia de Kilrethny ministrabit recipiet annuatim a dictis abbate et conventu decem marcas sterlingorum ad duos anni terminos videlicet medietatem ad Pentecosten et aliam medietatem ad festum sancti Martini in hyeme et istud idem ordinamus et statuimus de vicario qui in ecclesia de Saultoun ministrabit vicarius vero de Golyn deserviturus recipiet a dictis abbate et conventu duodecim marcas sterlingorum annuas ad duos anni terminos supradictos vicarius vero qui in ecclesia de Childenkirk ministrabit qui quidem faciet obedienciam tam pro ecclesia de Childenkirk quam pro capella de Lawder recipiet a prefatis abbate et conventu decem libras annuas ad duos anni terminos supradictos et dicti abbas et conventus facient de servire dicte capelle per unum honestum capellanum Et sciendum est quod dicti abbas et conventus omnia onera ordinaria et extraordinaria ad dictas ecclesias pertinentia sustinebunt a quibus dicti vicarij erunt immunes excepto quod vicarius de Kilrethny pro domibus suis situalis in terra nostra solvet nobis et successoribus nostris annuatim tres solidos medietatem ad Assumptionem beate Marie virginis et aliam medietatem ad Purificationem beate virginis Marie dicti vero abbas et conventus alijs vicarijs domicilia assignabunt que ipsi vicarij inposterum sustentabunt Et si forte contingat prefatos abbatem et conventum per predictos vicarios vel per aliquem successorum nostrorum contra istam ordinationem nostram aliquo tempore indebite molestari volumus pro nobis et successoribus nostris ut liceat eisdem abbati et conventui dictis ecclesijs parochialibus per canonicos suos secundum tenorem indulgenciarum predecessorum nostrorum sibi indultarum sicut prius consueverunt de servire Hec autem omnia et singula predicta pro nobis et successoribus nostris auctoritate episcopali confirmamus et in robur perpetuum et testimonium presenti scripto sigillum nostrum apponi fecimus Nos autem super statu dictorum religiosorum paterna pietate compacientes pro salute nostra predecessorum et successorum nostrorum dictorum predecessorum ordinationem et capituli sancti Andree confirmacionem ratam habentes et firmam pro nobis et successoribus nostris sigillum nostrum est appensum Datum apud Driburgh die sabbati proxima ante festum cathedre sancti Petri anno gracie millesimo tricentesimo decimo octavo Hijs testibus magistro Roberto de Lamberton archidiacono sancti Andree magistris Willelmo de Eglisham archidiacono Laudonie Alexandro de Rekildoun domino David de Crausurd et alijs