Charter Document - 07300288
| Charter Number: | 07300288 |
|---|---|
| Cartulary Title: | Liber Sancte Marie de Dryburgh |
| Charter Language: | Latin |
| Charter Origin: | Lay |
| Charter Type(s): | Confirmation |
| Date: | 1240 - 1255 |
| Date type: | Assigned |
| Resource Link(s): |
People of Medieval Scotland |
Charter:
Omnibus sancte matris ecclesie filijs ad quos presentes pervenerint Alexander de Wallibus dominus de Dyrlton salutem in Domino sempiternam Sciant presentes et futuri me divine pietatis intuitu dedisse concessisse et hac presenti carta mea confirmasse Deo et beate Marie et abbati et canonicis de Driburgh totam insulam sancti Nicholaij de Elbotle et viginti acras terre et dimidiam in territorio de Elbotle sicut perambulata fuit coram probis hominibus scilicet que jacet per orientem et aquilonem proxime veteri castello similiter et ipsum vetus castellum totum cum fossis suis et Stodsaldum et centum pedes terre ex omni parte Stodsaldi infra fossatum et omnes fossas et communem pasturam tres centis ovibus et decem vaccis et duodecim bobus cum omnibus aysiamentis ville de Elbotle et de Dyrlton et spacium cum libero introitu et exitu ad ovile suum faciendum ubi eijs placuerit inter vetus castellum et locum qui vocatur Vakelaue et focale in petario de Elbotle vel de Dyrlton ubi eijs placuerit et coopertorium de beneta vel de alio coopertorio ad domos suas ubi eijs placuerit et petram in petrasodina de Golyn ad edificia sua quantum opus habuerint Concessi etiam predictis abbati et canonicis de Driburgh terram Reginaldi Taylur cum tofto et crofto suo in villa de Dyrltoun in puram et perpetuam elemosinam ita quod idem Reginaldus et heredes ejusdem liberi et quieti ab omni seculari exactione eandem terram de predictis abbate et canonicis teneant Reddendo eisdem inde annuatim octo solidos argenti ad festum Pentechosten et ad festum beati Martini in hyeme Concessi etiam canonico Deo servienti in Stodfald hanc libertatem ut ubique in molendinis meis sit liber a multura et ut proxime molat post eum quem malentem invenerit Has autem donaciones et has libertates concessi eijs in puram et perpetuam elemosinam ita libere quiete et honorifice sicut alique elemosine liberius quietius et honorificentius in regno Scotie ab aliquibus viris religiosis possidentur pro salute anime mee et uxoris mee et pro salute animarum patris mei et matris mee et heredum meorum et antecessorum et successorum meorum Maledictionem autem Dei et sancte Marie et meam heredibus meis et successoribus meis relinquo qui has donaciones meas et has libertates in irritum ducere temptaverint vel inpugnare presumpserint In cujus rei testimonium presenti carte mee sigillum meum apposui Hijs testibus domino Roberto de Keth domino Henrico de sancto Claro domino Willelmo de Fenton domino Johanne de Fenton domino Alexandro de Seton militibus Waltero de Congilton Roberto filio Adam [de] Dyrlton Willelmo Surtheus Patricio de Hirdmanston Nicholaio de May et multis alijs