Charter Document - 07300252

Alexander episcopus servus servorum Dei venerabilibus fratribus sancti Andree et Glasguensis episcopis et dilectis filijs abbatibus prioribus decanis archidiaconis prepositis archiepiscopis et alijs ecclesiarum prelatis per sancti Andree et Glasguensis civitates et dioeceses constitutis salutem et apostolicam benedictionem Non absque dolore cordis et plurima perturbacione didicimus quod ita in plerisque partibus ecclesiastica censura dissolvitur et canonice sententie severitas enervatur ut viri religiosi et hij maxime qui per sedis apostolice privilegia majori donati sunt libertate passim a malefactoribus suis injurias sustineant et rapinas dum vix invenitur qui congrua vel protectione subveniat et pro fovenda pauperum innocencia se murum defensionis opponat specialiter nunc dilecti filij abbas et fratres monasterij de Driburgh Premonstratensis ordinis sancti Andree dioecesis tam de presentibus injurijs quam de ipso quotidiano defectu justitie conquerentes universitatem vestram literis petierunt apostolicis excitari ut ita videlicet eis in tribulationibus suis contra malefactores eorum prompta debeatis magnanimitate consurgere quod ab angustijs quas sustinent et pressuris vestro possint presidio respirare ideo universitati vestre per apostolica scripta mandamus atque precipimus quatinus illos qui possessiones vel res seu domos predictorum fratrum irreverenter invaserunt aut ea injuste detinuerunt que predictis fratribus ex testamento decedentium relinquuntur seu in ipsos fratres vel ipsorum aliquem contra apostolice sedis indulta sentenciam excommunicationis aut interdicti presumpserit promulgare vel decimas laborum de terris habitis ante consilium generale ante quod susceperunt Premonstratensis ordinis instituta quas proprijs manibus aut sumptibus excolunt seu de nutrimentis animalium suorum spretis apostolice sedis privilegijs extorquere monicione [premissa] si laycus fuerit publice candelis accensis singuli vestrum in dioecesibus et ecclesijs vestris excommunicationis sentencia percellatis si vero clerici vel canonici regulares seu monachi fuerint eos appellatione remota ab officio et beneficio suspendatis neutram relaxaturi sentenciam donec predictis fratribus plenaria satisfaciant et tam layci quam clerici seculares qui pro violenta manuum injectione in fratres eosdem vel ipsorum aliquem anathematis vinculo fuerint innodati cum dioecesani episcopi literis ad sedem apostolicam venientes ab eodem vinculo mereantur absolvi Datum Anagnie xv kalendas Augusti pontificatus nostri anno secundo