Charter Document - 07300235
| Charter Number: | 07300235 |
|---|---|
| Cartulary Title: | Liber Sancte Marie de Dryburgh |
| Charter Language: | Latin |
| Charter Origin: | Religious |
| Charter Type(s): | Protection |
| Date: | 1165 - 1178 |
| Date type: | Assigned |
| Resource Link(s): |
People of Medieval Scotland |
Charter:
Ricardus Dei gratia humilis Scottorum episcopus universis sancte matris [] eternam in Domino salutem Cum ea que ad virorum religiosorum sustentationem a fidelibus Dei devote collata sunt multorum perversitas non sine gravi peccato minuere auferre vel perturbare impudenter non timeat summo opere ipsos ecclesie pastores decet malorum incursus vigilanter providendo precavere et si quid crudeliter aut temere in servos Dei presumptum fuerit gladium spiritus cum Petro viriliter et secundum canones fideliter exercere Quod nobiscum crebro et sollicite pertractantes religiose etiam conversationis fratrum de Driburgh odore provocati ecclesiam sancte Marie et sancti Johannis evangeliste ibidem sitam et fratres in ea Deo servientes in beati Andree apostoli et nostra protectione suscipimus et presentis scripti patrocinio communimus Preterea quascunque possessiones quoscunque redditus quecunque bona in dioecesi nostra juste et canonice in presenti possident vel Deo propitiante in futuro potuerint adipisci eis episcopali auctoritate perpetuo possidenda confirmamus et hec proprijs vocabulis exprimimus ecclesiam de Myrtoun cum terra adjacente et omnibus pertinentijs suis ecclesiam de Childinchirch cum terra adjacente et omnibus pertinentijs suis ecclesiam de Saultoun cum terra adjacente et omnibus pertinentijs suis Langelaw per rectas divisas suas piscationes de Berwic decimam molendinorum de Saultoun et de Lauder decimam molte de Newtoun et de Naythenthirn grangiam de Caddisley per rectas divisas suas et metas que in autentico scripto inter eos et monachos de Melros mediantibus viris religiosis et discretis pro bono pacis facto continetur ecclesiam de Kilrethny cum omnibus pertinentijs et rectitudinibus suis dimidiam carucatam terre in Petcortyn et unum plenum toftum in Carale Decernimus ergo et concedendo in presentia synodi nostre eis confirmamus ut prefata beneficia tam libere quiete et plenaria in usus proprios perpetuo teneant et possideant sicut carte eorum confirmant qui eadem beneficia eis pie contulerint Testibus []