Charter Document - 07300234
| Charter Number: | 07300234 |
|---|---|
| Cartulary Title: | Liber Sancte Marie de Dryburgh |
| Charter Language: | Latin |
| Charter Origin: | Religious |
| Charter Type(s): | Protection |
| Date: | 1221 |
| Date type: | Internal, A.D., Calendar, Papal |
| Resource Link(s): |
People of Medieval Scotland |
Charter:
Frater Jacobus domini Pape penitenciarius et capellanus apostolice sedis legatus dilectis in Christo filijs abbati et canonicis de Driburgh regularem vitam professis salutem in Domino Justis petentium desiderijs facile debemus prestare assensum et vota que a rationis tramite non discordant effectu tenemur prosequente complere ea propter dilecti in Domino filij justis vestris postulationibus clementer annuimus et partes vestras et locum in quo Domino deservitis et grangias et domos et terras ei adjacentes et proprijs vocabulis expressas ecclesiam de Myrtona ecclesiam de Lessydewyn ecclesiam de Childinchirch ecclesiam [de] Samilstoun ecclesiam de Kylrethny cum omnibus pertinentijs et rectitudinibus que ad predictas ecclesias spectare videntur sicut eas juste adepti estis et ante tempus vel in tempore legationis nostre in Scotia liberius et quietius vel plenius canonice possedistis sub protectione beati Petri apostoli domini Pape et nostra recipimus et inperpetuum confirmantes vos super hoc presentis scripti patrocinio communimus Ad hoc etiam paupertati vestre compatientes et paci inposterum pie providere volentes ecclesiam de Sowrby in Galwithia cum omnibus pertinentijs suis et ecclesiam de Lanark cum omnibus ad eandem de jure spectantibus et capellam de Padnynnane cum omnibus pertinentijs suis a dioecesanis episcopis pie et canonice vobis in usus proprios concessas et autenticis eorum scriptis plenaria roboratas statim a decessu clericorum si qui eas nomine vestro possideant vobis possidendas confirmamus non obstante consuetudine que nomine proprio possidentibus primo post decessum anno sub pietatis specie beneficia ecclesiastica indulgere solet compositionem vero inter vos et canonicos de Jeddewod super ecclesia de Lessedewyn pro bono pacis factam et compositionem inter vos et monachos de Melros super metis terrarum vestrarum et grangie vestre de Caddisley et super alijs quibusdam capitulis mediantibus viris religiosis et discretis pridem factam et diu habitam sicut in instrumento exinde confecto et sigillis eorum roborato plenius continetur sentenciam quoque per judices a summo pontifice delegatos pro vobis rite latam super capella de Clegern pertinente ad matricem ecclesiam de Lanark sicut in autentico eorundem judicum exinde facto et sigillis eorum munito continetur compositionem inter vos etiam et Willelmum de Vallibus militem ex una parte et moniales de Southberwic ex altera super ecclesia de Golyn in presencia nostra mediantibus viris religiosis et discretis factam sicut in instrumentis exinde confectis et sigillo nostro sigillisque utriusque partis roboratis plenius continetur cum omnibus que prenominata sunt beneficijs et libertatibus auctoritate qua fungimur in presenti vobis et posteris vestris inperpetuum communimus et hanc confirmacionem nostram ratam de cetero et irrefragabiliter conservandam fore sancimus Nulli ergo hominum liceat hanc paginam nostre protectionis et confirmationis infringere vel ei ausu temerario ali quatinus contraire si quis autem hoc attentare presumpserit indignationem omnipotentis Dei et beatorum Petri et Pauli apostolorum ejus et domini Pape et nostram se noverit incursurum Datum Driburgh anno sub incarnatione Domini millesimo CCXXI papatus domini Honorij quinto ix kalendas Maij