Charter Document - 07300208
| Charter Number: | 07300208 |
|---|---|
| Cartulary Title: | Liber Sancte Marie de Dryburgh |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1252 |
| Date type: | Internal, A.D., Feast |
| Resource Link(s): |
People of Medieval Scotland |
Charter:
Sciant presentes et futuri quod cum questio inter abbatem et conventum de Driburgh ex parte una et abbatem et conventum de Melros ex altera super quibusdam decimis ad ecclesiam de Lessedewyn spectantibus verteretur tandem amicabilis compositio intervenit de dictis decimis videlicet quod salvis dictis abbati et conventui de Driburgh decimis garbarum et feni quas ipsi ante confectionem hujus instrumenti continue perceperunt de terris quas portarius de Melross tenuit in territorio de Ylistoun infra parochiam de Lessedewyn die confectionis hujus instrumenti prefati abbas et conventus de Melros solvent annuatim per portarium suum de Melros dictis abbati et conventui de Driburgh unam marcam argenti in nundinis de Rogesburgh pro omni alia indemnitate dicte ecclesie ratione dictarum terrarum Tenentes vero si quos dicti abbas et conventus de Melros in dictis terris habuerint et servientes eorundem abbatis et conventus de Melros qui per annum vel per dimidium annum infra dictam parochiam in servicio suo moram fecerint omnia jura ecclesiastica tam in vita quam in obitu suo matrici ecclesie de Lessedewyn plenaria persolvent Si vero contingat quod aliqui alij quam dicti abbas et conventus de Melros dictas terras quoquo modo tenuerint dicta matrix ecclesia de Lessedewyn omnia jura ecclesiastica de ipsis percipiet et dicti abbas et conventus de Melros quieti erunt tantundem a solutione dicte marce salvis in omnibus prescriptis articulis cum dicte terre ad ipsos de Melros fuerint resolute Et si contingat quod dicti abbas et conventus de Melros aliquas terras in parochijs dictorum abbatis et conventus de Driburgh quoquomodo tenuerint vel adquisierint a tempore confectionis presentium sive abbas et conventus de Driburgh in parochijs abbatis et conventus de Melros aliquas terras tenuerint vel adquisierint utraque ecclesia servabitur indemnis per consilium patrum abbatum de Rivelle et de Alnewike qui tertiam partem neutri parti suspectam eligent quorum jurisdictioni et potestati utraque pars se sponte subjecit ut ipsi patres abbates ad omnium premissorum observantiam utramque partem per censuram ecclesiasticam libere valeant cohercere In cujus rei testimonium huic parti chyrographi penes dictos abbatem et conventum de Driburgh remanenti abbas de Melros sigillum suum una cum sigillo sui patris abbatis de Rivalle apposuit Acta apud Melros anno gratie millesimo ducentesimo quinquagesimo secundo die beate Marie Magdelene