Charter Document - 07281118
| Charter Number: | 07281118 |
|---|---|
| Cartulary Title: | Registrum Monasterii Sancte Marie de Cambuskenneth, A.D. 1147-1535 |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1214 |
| Date type: | Internal, Calendar, Papal |
| Resource Link(s): |
People of Medieval Scotland |
Charter:
Innocentius episcopus seruus seruorum Dei dilectis filiis de Lundoris et de Abirbrothok abbatibus et priori de May dioecesis Sancti Andree salutem et apostolicam benedictionem Dilecti filii abbas et conuentus de Dunfermeling sua nobis conquestione monstrarunt quod cum abbas et canonici de Cambuskynneth dioecesis Sancti Andree eosdem super quibusdam decimis quas ad ecclesiam suam de Striueling pertinere dicebant coram venerabili fratre nostro episcopo Dunblanensi et coniudicibus suis delegatis a nobis traxissent in causam et ipsi super capella de Donypais auctoritate nostra conuenissent eosdem tandem venerabili fratre nostro Episcopo Sancti Andree ac collegis ipsius in quos fuit a partibus compromissum inter ponentibus partes suas inter eos amicabilis compositio interuenit quam vltra quinquennium obseruatam dicti abbas et canonici de Cambuskynneth nituntur infringere minus iuste contra iuramentum prestitum temere venientes ideoque discretioni vestre per apostolica scripta mandamus quatenus compositionem ipsam sicut sine prauitate prouide facta est et ab vtraque parte sponte recepta faciatis per censuram ecclesiasticam appellatione remota firmiter obseruari Quod si vero omnes hiis exequendis non potueritis interesse duo vestrum ea nihilominus exequantur vos denique filii abbates super vobis ipsis et credito vobis grege taliter uigilatis exstirpando vicia et plantando virtutes vt in nouissimo districti examinis die coram tremendo iudice qui reddet vnicuique secundum opera sua dignam possitis reddere rationem Datum Lateranensi nono Nouembris pontificatus nostri anno septimo decimo