Charter Document - 07280184

Omnibus Christi fidelibus presens scriptum visuris vel audituris Richardus Dei gratia episcopus Dunkeldensis eternam in Domino salutem Nouerit vniuersitas vestra nos de communi consensu et assensu decani et capituli nostri Dunkeldensis et virorum religiosorum abbatis et conuentus de Cambuskynneth de ecclesiis de Kinclevyn et de Lecroth nostre dioecesis auctoritate nostra pontificali in forma subscripta ordinasse videlicet quod cum ecclesia de Kinclevin in duas partes esset diuisa quarum altera pars ad precentorem ecclesie Dunkeldensis pertinebat et altera pars ad viros religiosos abbatem et conuentum de Cambuskynneth propter quam sectionem non modicum imminebat periculum animarum et eidem ecclesie minus honeste deseruiebatur nos huiusmodi periculis remedium adhibere volentes et tam ecclesie nostre Dunkeldensis quam dicti monasterii de Cambuskynneth vtilitatem in hac parte attendentes de communi vtriusque capituli voluntate concedimus et ordinamus quod dicta ecclesia de Kinclevyn cum omni cura et onere integre et pleno jure cum terris decimis et obuencionibus et omnibus aliis iuste ad ipsam pertinentibus ad precentoriam ecclesie Dunkeldensis pertineat inperpetuum saluis dictis abbati et canonicis sex marcis annuis per manus precentoris ecclesie Dunkeldensis qui pro tempore fuerit singulis annis ad festum Sancti Martini in hieme in dicta ecclesia de Kinclevin inperpetuum percipiendis nomine simplicis beneficii sine omni cura et onere ordinariis vel extraordinariis remotis omni con tradictione cauillatione et impedimento ex aliqua causa vel occasione proueniente et si contingat precentorem Dunkeldensem qui pro tempore fuerit vltra quindenam post terminum statutum a solutione dictarum sex marcarum cessare quod absit qualibet ebdomada vltra quindenam post terminum qua cessauerit dimediam marcam ad fabricam pontis de Dunkeld nomine pene persoluet nos vero episcopus Dunkeldensis et successores nostri compellamus dictum precentorem tam ad solutionem dictarum sex marcarum quam ad dictam penam firmiter obseruandam et dictos abbatem et conuentum contra quoscunque indemnes conseruabimus Dictus vero precentor ecclesie de Kinclevin per ydoneum capellanum honeste faciet deseruire et de episcopalibus et omnibus oneribus ad dictam ecclesiam pertinentibus respondebit et idem precentor vnum capellanum ydoneum et honestum preter suum vicarium inueniet in ecclesia Dunkeldensi ad missam Sancte Marie virginis singulis diebus inperpetuum celebrandam qui decano et capitulo Dunkeldensi presentabitur et horis canonicis in habitu honesto intererit et jus vicarie percipiet concedimus eciam et ordinamus quod supradicta ecclesia de Lecroth in qua dicti abbas et conuentus de Cambuskynneth ante istam nostram ordinationem nullum ius habuerunt cum omni cura et onere integre et pleno jure cum terris decimis et obuentionibus et omnibus aliis ad ipsam iuste pertinentibus ad dictos abbatem et conuentum ex nostra collatione pertineat inperpetuum in vsus proprios prout melius viderint expedire conuertendo Faciendo eidem ecclesie de Lecroth per vnum ydoneum capellanum nobis et successoribus nostris pro tempore presentandum deseruire ita quod non teneantur nec compellantur presentare ad dictam ecclesiam perpetuum vicarium saluis nobis et successoribus nostris episcopalibus in eadem ecclesia prout antiquitus facere consueuerunt et si qua instrumenta regum vel pontificum fuerint inuenta que istam nostram ordinationem aliquibus temporibus possint impedire vacua sint et inania et vtriusque capituli assensu et voluntate viribus carentia contingente vero casu quod aliquis velit dictos abbatem et conuentum super predicta ecclesia de Lecroith impugnare nos episcopus Dunkeldensis et successores nostri eosdem contra quoscunque defendemus et sciendum est quod jus quod dicti abbas et conuentus habuerunt in dicta ecclesia de Kinclevyn tale fuit quod dicti abbas et conuentus perceperunt dimidietatem omnium decimarum et integre omnes oblationes et obuentiones propter quas dicti abbas et conuentus dicte ecclesie de Kinclevin per ydoneum capellanum honeste fecerunt deseruire et vt hec nostra ordinatio perpetue firmitatis robur obtineat presenti scripto penes dictos abbatem et conuentum de Cambuskynneth permansuro sigillum nostrum vnacum communi sigillo capituli nostri Dunkeldensis fecimus apponi et alteri scripto eiusdem tenoris penes capitulum nostrum Dunkeldense remanenti sigillum nostrum vnacum sigillo communi abbatis et conuentus de Cambuskynneth est appensum datum apud Dunkeld in crastino Omnium Sanctorum anno gracie millesimo ducentesimo sexagesimo