Charter Document - 07280114
| Charter Number: | 07280114 |
|---|---|
| Cartulary Title: | Registrum Monasterii Sancte Marie de Cambuskenneth, A.D. 1147-1535 |
| Charter Language: | Latin |
| Charter Origin: | Religious |
| Charter Type(s): | Order |
| Date: | 1295 |
| Date type: | Internal, A.D., Calendar |
| Resource Link(s): |
People of Medieval Scotland |
Charter:
Uniuersis sancte matris ecclesie filiis ad quos presentes littere peruenerint Willelmus miseratione diuina ecclesie Sancti Andree minister humilis salutem et benedictionem diuinam Pastoralis officii decet solicitudinem gregis sibi commissi statum et merita diligenter inquirere vt benemeritos affectione paterna fouendo errantes sue correctionis occasionem possint assumere Nos igitur statu monasterii de Cambuskynneth nostre dioecesis diligenter perquisito inuenientes dictum monasterium vltra quam deceret subuentione bonorum temporalium indigere statum dicti monasterii prout possumus dignum duximus releuandum vt dicto monasterio per bona temporalia releuato cultus diuinus ibidem suscipere valeat incrementum Volumus igitur et de gratia nostra speciali fauorabiliter ordinamus vtabbas et conuentus monasterii prelibati omnes fructus oblationes et obuentiones ad ecclesiam de Kirketoun nostre dioecesis pertinentes seu quoquomodo pertinere valentes cuius ecclesie sola rectoria ad dictum monasterium vsque ad hec tempora pertinebat integre et plene percipiant et in vsus suos pro suo arbitrio conuertant et dicte ecclesie per ydoneos capellanos quos eligere voluerint honeste prout loci qualitas et salus animarum exposcit faciant deseruiri Volumus autem vt si opus fuerit et dictis abbati et conuentui vtile visum fuerit huic nostre concessioni aliquid addere vel detrahere quod dicti monasterii commodum respiciat aut quietem vel si in nouam formam penitus eam voluerint immutare quod nostri sigilli munimine sine difficultate aliqua hec nostra gracia seu ordinatio roboretur In cuius rei testimonium has litteras nostras patentes per quas dictam ecclesiam de Kirketoun seu fructus oblationes et obuentiones predicte ecclesie dicto monasterio integre et plene conferimus sepe dictis abbati et conuentui tradidimus patentes Datum apud Falkland decimo septimo kalendas Junii anno ab Incarnatione Domini millesimo ducentesimo nonagesimo quinto salua nobis et successoribus nostris canonica obediencia