Charter Document - 07280105

Universis Sancte matris ecclesie filiis presentes litteras visuris vel audituris Fargusius miseratione diuina Abbas de Cambuskynneth et eiusdem loci conuentus humilis salutem in Domino sempiternam Vniuersitati vestre notum facimus quod cum ius patronatus ecclesie de Glenilef cum terris et aliis omnibus rectitudinibus ad ipsam ecclesiam de Glenilef spectantibus per inclite memorie dominum Willelmum dudum regem Scottorum illustrem monasterio de Cambuskynneth et canonicis ibidem Deo seruientibus in liberam et perpetuam elemosinam caritatis intuitu fuerit collatum et deinde per venerabilem in Cristo patrem dominum Gregorium bone memorie episcopum Brechinensem ipsius loci dioecesanum pensio annua decem librarum sterlingorum in ipsa ecclesia monasterio nostro predicto et nobis fuerit assignata fueritque in solutione seu prestatione ipsius pensionis iam per aliquos annos cessatum non sine dampno nostro et monasterii nostri memorati tandem per consilium et ordinationem amicorum communium assensu eciam venerabilis in Cristo patris domini Johannis Dei gracia tunc Brechinensis ecclesie episcopi accedente vtilitatem et quietem monasterii nostri predicti et etiam monasterii de Cupro in Angus cui dicta ecclesia de Glenilef est vicina affectancium quorum consilium et ordinationem approbamus et suscepimus predictum ius patronatus cum terris et aliis omnibus rectitudinibus ad prefatam ecclesiam de Glenileff spectantibus et omne ius quod in premissis habuimus vel occasione ipsorum habere potuimus sponte et pure eisdem Abbati et Conuentui de Cupro concessimus et plene transtulimus in eosdem salua tamen monasterio nostro predicto et nobis annua pensione decem librarum in ecclesia ipsa de Glenileff ad cuiuscunque seu quorumcunque manus deueniat in posterum per predictos abbatem et conuentum de Cupro eorum sumptibus et periculo nobis seu nostro procuratori in domo fratrum predicatorum de Perth singulis annis ad duos anni terminos videlicet medietatem ad festum Pentecostes et aliam medietatem ad festum Sancti Martini in hieme integre et sine dilatione seu excusatione persoluenda primo termino solutionis incipiente in festo Pentecostes proximo futuro hoc inter predictos abbates et eorum conuentus specialiter acto et conuento quod si contingat predictos abbatem et conuentum de Cupro in solutione predicte pensionis dictis terminis seu eorum aliquo ex causa manifesta et euidenti non impeditos vltra octo dies quod absit deficere obligant se et omnia bona sua presencia et futura mobilia et inmobilia ad ministrandum seu inueniendum procuratori predictorum abbatis et conuentus de Cambuskynneth expensas sufficientes pro tempore quo ipsam solutionem eum contigerit expectare et nihilominus ad soluendum singulis septimanis quibus ipsos in solutione alicuius termini cessare contigerit fabrice ecclesie Dunblanensis dimidiam marcam nomine pene supponentes se quantum ad hoc iurisdictioni seu cohertione domini episcopi Dunblanensis renunciantes in hoc facto omnibus priuilegiis ordini Cisterciensi seu abbati et conuentui de Cupro concessis vel in posterum concedendis per que presens conuentio infirmari poterit in futurum In quorum omnium testimonium seu probationem parti huius scripti in modum chirographi confecti penes abbatem et conuentum de Cupro remanenti sigillum commune capituli de Cambuskynneth vnacum sigillis venerabilium patrum domini Johannis Dei gracia Brechinensis episcopi supradicti et domini Nicholai eadem gracia Dunblanensis episcopi est appensum parti vero penes prefatos abbatem et conuentum de Cambuskynneth remanenti sigillum commune monasterii de Cupro vnacum sigillis predictorum dominorum Brechinensis et Dunblanensis episcoporum est appositum actum conuentum et datum apud Sanctum Andream duodecimo die mensis Septembris anno ab Incarnatione Domini millesimo tricentesimo vndecimo