Charter Document - 07280063

Clemens Episcopus seruus seruorum Dei dilectis filiis Abbati et Conuentui Monasterii Beate Marie de Cambuskynneth ordinis Sancti Augustini Sancti Andree dioecesis salutem et apostolicam benedictionem Sincere deuotionis affectus quem ad nos et Romanam geritis ecclesiam promeretur vt vos et monasterium vestrum fauoribus apostolicis prosequamur dudum siquidem pro parte vestra nobis exposito quod tam vos quam predictum monasterium propter guerras que diutissime in illis partibus uiguerant ac propter quosdam iniquitatis filios qui calices libros ceteraque ornamenta altaris et diuersa alia bona ipsius monasterii rapuerunt et secum asportarunt et eciam propter quemdam ictum tonitrui et fulguris que supra campanile ipsius monasterii ceciderant eratis in magnis erumpnis et necessitatibus constituti chorusque dicti monasterii magnam ruinam paciebatur ad quam reparandam seu reficiendam vos eratis totaliter impotentes nos perpetuam vicariam parrochialis ecclesie de Clacmanan dicte dioecesis tunc certo modo vacantem cuius fructus redditus et prouentus decem marcarum sterlingorum vt asserebatur valorem annuum communiter non excedebant vobis ac eidem monasterio inperpetuum auctoritate apostolica per alias nostras literas vniuimus et in corporauimus prout in eisdem literis plenius continetur Cum autem sicut exhibita nobis nuper pro parte vestra peticio continebat fructus redditus et prouentus huiusmodi maioris quam predicitur valoris existant licet quindecim marcarum dicte monete secundum taxationem decime valorem non excedant annuatim et propterea dubitetis super eadem vicaria posse vos impostorum molestari Nos volentes vos ac dictum monasterium fauore prosequi gracioso vestris in hac parte supplicationibus inclinati volumus et apostolica auctoritate vobis concedimus quod prefate litere et quecumque inde secuta perinde a data presencium valeant plenaque roboris firmitate obtineant ac si in eisdem literis quod fructus redditus et prouentus huiusmodi quindecim marcarum dicte monete secundum taxationem predictam valorem non excederent annuatim specialis et expressa mentio facta foret Nulli ergo omnino hominum liceat hanc paginam nostre voluntatis et concessionis infringere vel ei ausu temerario contraire si quis autem hoc attemptare presumpserit indignationem omnipotentis Dei et beatorum Petri et Pauli apostolorum eius se nouerit incursurum Datum Avinione quinto Kalendas Februarii pontificatus nostri anno secundo