Charter Document - 07280062

Clemens Episcopus seruus seruorum Dei ad perpetuam rei memoriam Apostolice sedis circumspecta benignitas vota personarum humilium maxime diuinis laudibus sacreque religionis obseruancie deditarum gracioso libenter fauore prosequitur eorumque necessitatibus occurrit remediis oportunis dudum siquidem felicis recordationis Gregorius Papa sextus predecessor noster omnes vicarias perpetuas ceteraque beneficia ecclesiastica cum cura et sine cura quorumcunque per assecutionem pacificam archidiaconatuum dignitatum personatuum officiorum ac beneficiorum aliorum ecclesiasticorum quorumlibet per eum seu eius auctoritate tunc collatorum et in antea conferendarum eisdem tunc vacancia et in posterum vacatura collationi et dispositioni sue reseruans decreuit ex tunc irritum et inane si secus super hiis a quoquam quauis auctoritate scienter vel ignoranter contigerit attemptari et deinde perpetua vicaria parrochialis ecclesie de Clacmanan Sancti Andree dioecesis ex eo vacante quod dilectus filius Mauricius de Stratherne archidiaconus ecclesie Dumblanensis tunc dictam vicariam obtinens archidiaconatum dicte ecclesie Dumblanensis qui dignitas est tunc vacantem auctoritate literarum dicti predecessoris sibi collatum extitit pacifice assecutus prefatoque predecessore per eum de dicta vicaria minime disposito sicut Domino placuit sublato de medio nos diuina fauente clemencia ad apicem summi apostolatus assumpti cum a nonnullis reuocaretur in dubium an post dicti predecessoris nostri obitum aliquis preter Romanum Pontificem de vicariis et aliis beneficiis supradictis per dictum predecessorem nostrum dispositioni sue reseruatis et tempore obitus eiusdem predecessoris vacantibus disponere potuisset siue posset nos ad huiusmodi ambiguitatis tollendum dubium per nostras literas declarauimus huiusmodi vicarias et alia beneficia supradicta que tempore obitus eiusdem predecessoris nostri vacabant vt prefertur remansisse et remanere per huiusmodi reseruationem et decretum affecta nullumque de illis preter Romanum Pontificem potuisse vel posse disponere quoquomodo decernentes ex tunc irritum et inane quicquid in contrarium a quoquam quauis auctoritate scienter vel ignoranter attemptatum forsan erat tunc vel contigerit impostorum attemptari et deinde exhibita nobis pro parte dilectorum filiorum abbatis et conuentus monasterii beate Marie de Cambuskynneth ordinis Sancti Augustini dicte dioecesis peticio continebat quod tam ipsi quam predictum eorum monasterium propter guerras que diutissime in illis partibus viguerunt et propter quosdam iniquitatis filios qui calices libros ceteraque ornamenta altaris et diuersa alia bona ipsius monasterii rapuerunt et secum asportarunt ac eciam propter quendam ictum tonitrui et fulguris qui supra campanile ipsius monasterii cecidit sicut in magnis erumpnis et necessitatibus constituti chorusque dicti monasterii magnam ruinam patitur ad quem reparandum seu reficiendum iidem abbas et conuentus sunt totaliter impotentes Quare pro parte dictorum abbatis et conuentus nobis fuit humiliter supplicatum quatenus vt eorum erumpnis et necessitatibus predictis valeant obuiare predictam vicariam cuius rectoriam iidem abbas et conuentus vt asserunt in proprios vsus obtinent et ad quos ius patronatus vicarie predicte noscitur pertinere cuiusque valor annuus decem marcarum sterlingorum vt asserunt communiter non excedit ipsis abbati et conuentui ac eorum monasterio vnire annectere et incorporare auctoritate apostolica dignaremur Nos eorundem abbatis et conuentus erumpnis et necessitatibus pio compacientes affectu ipsorum abbatis et conuentus in hac parte supplicationibus inclinati predictam vicariam sic vacantem de qua nullus preter Romanum Pontificem disponere potuit neque potest reseruatione decretis et declamatione obsistentibus supradictis abbati et conuentui ac monasterio predictis ex nunc inperpetuum auctoritate apostolica incorporamus annectimus et vnimus illamque ipsis concedimus in proprios vsus perpetuo possidendam ita quod liceat prefatis abbati et conuentui per se vel alium seu alios possessionem pacificam eiusdem vicarie auctoritate propria ingredi apprehendere et habere eiusque fructus redditus et prouentus in suam et dicti eorum monasterii vtilitatem conuertere ordinarii loci vel alterius cuiuscunque licentia minime requisita prouiso quod dicta vicaria cultu diuino et debitis obsequiis non fraudetur et animarum cura cui illa imminet nullatenus negligatur Volumus autem quod abbas qui est et erit pro tempore et conuentus dicti monasterii de ipsius vicarie reditibus et prouentibus canonico dicti monasterii vel presbytero ydoneo qui curam eiusdem vicarie exercebit per ipsos abbatem et conuentum ibidem deputando necessaria congrue ministrare et omnia alia tam pro huiusmodi cultu diuino et obsequiis incumbencia quam alia eiusdem vicarie consueta onera supportare et iura episcopalia soluere teneantur non obstantibus quibuscunque constitutionibus apostolicis et statutis et consuetudinibus monasterii et ordinis predictorum contrariis iuramento confirmatione apostolica vel quacunque firmitate alia roboratis seu si aliqui super prouisionibus sibi faciendis de huiusmodi vicariis vel aliis beneficiis ecclesiasticis in illis partibus speciales vel generales dicte sedis vel legatorum eius literas impetrarunt eciam si per eas ad inhibitionem reseruacionem et decretum vel alias quomodo libet sit processum quas literas et processus earum auctoritate habitos ad dictam vicariam volumus non extendi sed nullum per hoc eis quoad assecutionem vicariarum ac beneficiorum aliorum preiudicium generare seu quibuslibet preuilegiis indulgenciis et literis apostolicis generalibus vel specialibus quorumcunque tenorum existant per que presentibus non expressa vel totaliter non inserta effectus presencium impediri valeat quomodo libet vel deferri et de quibus quorumque totis tenoribus habenda sit in nostris litteris mencio specialis Nos enim prout est irritum decernimus et inane si secus super hiis a quoquam quauis auctoritate scienter vel ignoranter attemptatum forsan est hactenus vel contingeret impostorum attemptari Nulli ergo omnino hominum liceat hanc paginam nostre in corporationis annectionis vnionis concessionis et voluntatis infringere vel ei ausu temerario contraire Si quis autem hoc attemptare presumpserit indignationem omnipotentis Dei et beatorum Petri et Pauli apostolorum eius se nouerit incursurum Datum Auinione decimo septimo Kalendas Octobris pontificatus nostri anno primo