Charter Document - 07280025

Celestinus episcopus seruus seruorum Dei dilectis filiis Nicholao abbati ecclesie Sancte Marie de Striueling eiusque fratribus tam presentibus quam futuris canonicam vitam professis in perpetuum Pie postulatio voluntatis effectu debet prosequente compleri vt et deuotionis sinceritas laudabiliter enitescat et vtilitas postulata vires indubitanter assumat Ea propter dilecti in Domino filii vestris iustis postulationibus clementer annuimus et prefatam ecclesiam beate Marie de Striueling in qua diuino mancipati estis obsequio sub beati Petri et nostra protectione suscipimus et presentis scripti priuilegio communimus Inprimis siquidem statuentes vt ordo canonicus qui secundum Deum et beati Augustini regulam in eadem ecclesia institutus dinoscitur perpetuis ibidem temporibus inuiolabiliter obseruetur Preterea quascunque possessiones quecunque bona eadem ecclesia inpresenciarum iuste et canonice possidet aut in futurum concessione pontificum largitione regum vel principum oblatione fidelium seu aliis iustis modis prestante Domino poterit adipisci firma vobis vestrisque successoribus et illibata permaneant in quibus hec propriis duximus exprimenda vocabulis Locum ipsum in quo prefata ecclesia sita est ex dono et fundationis bone memorie Dauid regis cum omnibus pertinenciis suis villam de Cambuskynneth cum omnibus suis rectis diuisis et pertinenciis terram de Collyne et terram de Carsyn et Badyndeth cum nemore eiis assignato et cum omnibus suis rectis diuisis et pertinenciis Tulibotheuyn cum suis rectis diuisis insulam que dicitur Redinche que est inter Tulybotheuyn et Polmase villam de Ketilstoune cum molendino et omnibus suis rectis diuisis et pertinentiis terram que adiacet ripe de Forth inter Pulmille et viam que descendit de Striueling ad naues plenarium toftum in burgo de Striueling et aliud toftum in burgo de Lynlicku canum vnius nauis apud Striueling vnum rethe in aqua de Forth viginti cudrumis casei de redditu regis apud Striueling quadraginta solidos de redditu regis in Striueling vnam salinum et tantum terre quantum habet vna ex salinis regis ecclesiam de Clacmannane cum quadraginta acris terre et cum capellis suis et cum tofto capellani in villa de Clacmannan piscaturos de Carsyn et de Tulybotheyne libertates in teloniis et consuetudinibus quas idem Dauid rex et eius successores in cartis suis vobis et hominibus dominii vestri concesserunt piscaturam que est inter Cambuskynneth et Polmase dimidietatem coriorum et cepi et vnctorum totius occisionis regis apud Striueling ex donatione regis Malcolmi molendinum de Clakmannan excepta multura mense regis quotiens ad eandem villam venerit et excepta multura mense prepositi regis in eadem villa quinquaginta solidos de cano apud Perth ex donatione regis Willelmi vnum plenarium toftum in villa de Perth ecclesiam de Kynclethuyne cum terris et aliis suis pertinenciis ecclesiam de Tuly cultri cum omnibus suis pertinenciis ecclesiam de Kincardin cum terra ei assignata et omnibus pertinenciis suis ecclesiam de Glennilefe cum omnibus pertinenciis suis ex donatione Ade comitisse vnum plenarium toftum in burgo de Carraill et dimidiam carucatam terre cum communi pastura in Pethcorthyn et vnam marcam argenti de redditu suo de Carel et vnum plenarium toftum in burgo de Hadingtoune ex donatione Roberti episcopi Sancti Andree ecclesiam de Egglis cum capellis suis de Dunypas et de Lethberth et aliis capellis et oratoriis suis et cum omnibus aliis suis pertinenciis ex donacione Ricardi episcopi Dunkeldensis et ex regia confirmatione ecclesiam de Alweth cum pertinenciis suis ex donatione Alani filii Walteri vnum plenarium toftum in burgo de Renfrew et vnam piscaturam in aqua eiusdem ville ex donatione Philippi de Lundyn et eius filii Walteri dimidiam carucatam terre cum prato ad eam pertinente in Balcormok et pasturam quingentarum ouium et viginti vaccarum et vnius carucata boum ex donatione Willelmi de Lindesay vnam carucatam terre in villa de Bynnyn ex concessione et confirmatione Gocelini episcopi Glasguensis et Willelmi filii Thoraldi et ex regia confirmatione ecclesiam de Kirkintulach cum dimedia carucata terre et aliis suis pertinenciis et ex donatione Gilberti de Vmfrauuilla duas bouatas terre de Donypas Sane noualium vestrorum que propriis manibus aut sumptibus colitis siue de nutrimentis animalium vestrorum nullus a vobis decimas exigere vel extorquere presumat Liceat quoque uobis clericos vel laicos liberos et absolutos a seculo fugientes ad conuersionem recipere et eos absque contradictione aliqua retinere Prohibemus insuper vt nulli fratrum vestrorum post factam in loco vestro professionem fas sit absque abbatis sui licencia de eodem loco nisi arcioris religionis obtentu discedere discedentem vero absque communium literarum cautione nullus audeat retinere Cum autem generale interdictum terre fuerit liceat vobis clausis januis exclusis excommunicatis et interdictis non pulsatis campanis suppressa voce diuina officia celebrare In parochialibus vero ecclesiis quas habetis liceat vobis sacerdotes eligere et dioecesano episcopo presentare quibus si ydonei fuerint episcopus curam animarum committat vt ei de spiritualibus vobis autem de temporalibus debeant respondere Ad hec auctoritate apostolica duximus inhibendum ne quis in vos vel ecclesiam vestram excommunicationis vel interdicti sentenciam sine manifesta et causa rationabili promulgare seu nouis et indebitis exactionibus vos aggrauare presumat Sepulturam preterea ipsius loci liberam esse decernimus vt eorum deuotioni et extreme voluntati qui se illic sepeliri deliberauerint nisi forte excommunicati vel interdicti sint nullus obsistat salua tamen iusticia illarum ecclesiarum a quibus mortuorum corpora assumuntur Obeunte vero te nunc eiusdem loci abbate vel tuorum quolibet successorum nullus ibi qualibet surreptionis astucia seu violencia preponatur nisi quem fratres communi consensu vel fratrum pars consilii sanioris secundum Dei timorem et beati Augustini regulam prouiderint eligendum Paci quoque ac tranquillitati vestre paterna in posterum sollicitudine providere volentes auctoritate apostolica prohibemus vt infra clausuras locorum vestrorum nullus violenciam vel rapinam seu furtum committere ignem apponere sanguinem fundere hominem temere capere vel interficere audeat Decernimus ergo vt nulli omnino hominum liceat prefatam ecclesiam temere perturbare aut eius possessiones auferre vel ablatas retinere minuere seu quibuslibet vexationibus fatigare sed omnia integra conseruentur eorum pro quorum gubernatione ac sustentatione concessa sunt vsibus omnimodis profutura salua sedis apostolice auctoritate et dioecesani episcopi canonica iusticia si qua igitur in futurum ecclesiastica secularisve persona hanc nostre constitutionis paginam sciens contra eam temere venire temptauerit secundo tertiove commonita nisi reatum suum congrua satisfactione correxerit potestatis honorisque sui dignitate careat reamque se diuino judicio existere de perpetrata iniquitate cognoscat et a sacratissimo corpore ac sanguine Dei et Domini nostri redemptoris Jesu Christi aliena fiat atque in extremo examine diuine vltioni subiaceat Cunctis autem eidem loco sua jura seruantibus sit pax Domini nostri Jesu Christi quatenus et hic fructum bone actionis percipiant et apud districtum judicem premia eterne pacis inueniant Perfice gressus meos in semitis tuis Sanctus Petrus Sanctus Paulus Celestinus Papa Tertius Ego Celestinus catholice ecclesie episcopus Ego Albinus Albanensis episcopus Ego Octauianus Hostiensis et Velletrenensis episcopus Ego Johannes Prenestinus episcopus Ego Petrus Portuensis et Sancte Rufine episcopus Ego Gerardus Sancti Adriani diaconus cardinalis Ego Georgeus Sancte Marie in Porticu diaconus cardinalis Ego Gregorius Sancte Marie in Aquiro diaconus cardinalis Datum Lateranensi per manum Cencii Sancte Lucie in Orchea diaconi cardinalis domini pape camerarii tercio idus Maii indictione tercia decima incarnationis Dominice anno millesimo centesimo nonagesimo quinto pontificatus vero domini pape tertii anno quinto