Charter Document - 07280011
| Charter Number: | 07280011 |
|---|---|
| Cartulary Title: | Registrum Monasterii Sancte Marie de Cambuskenneth, A.D. 1147-1535 |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1329 |
| Date type: | Internal, Calendar, Papal |
| Resource Link(s): |
|
Charter:
Johannes episcopus seruus seruorum Dei dilectis filiis abbati et conventui monasterii de Cambuskynneth ordinis Sancti Augustini Sancti Andree dioecesis salutem et apostolicam benedictionem Cum a nobis petitur quod iustum est et honestum tam vigor equitatis quam ordo exigit rationis vt id per sollicitudinem officii nostri ad debitum producatur effectum sane petitio vestra nobis exhibita continebat quod nobilis vir Willelmus de Freslaw dominus de Fourgy Sancti Andree dioecesis de propria salute cogitans et cupiens terrena in celestia et transitoria in eterna salubri commertio commutare molendinum de Arryngrosk dicte dioecesis cum duabus acris terre adiacentibus dicto molendino cum omnibus juribus pertinenciis et aisiamentis ipsius molendini tunc ad dictum nobilem pertinentibus vobis et monasterio vestro pro suo et parentum suorum animarum remedio inperpetuum pia et prouida deliberatione donauit prout in patentibus literis inde confectis venerabilis fratris nostri episcopi Sancti Andree et dicti nobilis sigillis munitis plenius dicitur contineri nos itaque vestris supplicationibus inclinati quod super hoc pie et prouide factum est ratum et gratum habentes id auctoritate apostolica confirmamus et presentis scripti patrocinio communimus Nulli ergo omnino hominum liceat hanc paginam nostre confirmationis infringere vel ei ausu temerario contraire si quis autem hoc attemptare presumpserit indignationem omnipotentis Dei et beatorum Petri et Pauli apostolorum eius se nouerit incursurum Datum Avinione Kalendas Nouembris pontificatus nostri anno tercio decimo