Charter Document - 07280008

Vniuersis presentes literas inspecturis Willelmus de Freslay dominus de Fourgy miles salutem in Domino Cum inter opera caritatis illis potissim equilibet teneatur astrictus a quibus certum est eum beneficia recepisse ego beneficiorum et honorum michi ac predecessoribus meis a religiosis viris abbate et conuentu de Cambuskynneth collatorum non immemor in beneficiorum dictorum compensationem et anime mee salutem molendinum de Arryngrosk cum omnibus suis juribus libertatibus et aisiamentis et pertinentibus aut in futurum pertinere valentibus quocunque casu vel causa vnacum duabus acris terre dicto molendino adiacentibus in puram liberam et perpetuam elemosinam predictis abbati et conuentui caritatiue confero nulla penitus michi et heredibus aut successoribus meis juris alicuius aut recognitionis in dicto molendino aut aliquo ad dictum molendinum spectante seu in futurum spectare valente facta reseruatione excepta dumtaxat pensione annua quatuor solidorum sterlingorum monasterio de Culueros debita que a meis predecessoribus in dicto molendino predicto monasterio fuerat assignata sed totum jus quod in dicto molendino habeo in dictos abbatem et conuentum de Cambuskynneth pure transfero omni modo et conditione reiectis Volo eciam et per literas presentes fide super hoc prestita corporali me obligo et heredes ac successores meos quod nullum de nouo construere molendinum valeam vel valeant aut edificium seu opus quodcunque aliud facere per quod aut occasione cuius vtilitati dictorum religiosorum in aliquo poterit derogari Volo eciam et fide insuper super hoc prestita me et heredes ac successores meos obligo quod si aliqui tenentes mei qui ad dictum molendinum sectam debent a dicto molendino se subtraxerint aut ad dictum molendinum venientes prout de jure tenentur non satisfecerint ego et heredes ac successores mei non venientes vt veniant et non satisfacientes vt satisfaciant quantum districtius poterimus compellamus et distringimus scilicet tenentes meos de Arryngrosk et de Condelani vt ad dictum molendinum veniant et pro multura vicesimum quartum vas de grano sicco et humido persoluant illos autem de Newtoun vt ad dictum molendinum veniant et pro multura sextum decimum vas persoluant illos autem de Pettillok vt veniant et vicesimum quartum vas pro multura persoluant illos vero de Benn et de Cathol et de Catham vt veniant et de multura prout tenentur satisfaciant ac illos de Baleward nisi forte illi de Baleward aut eorum dominus docere poterint quare ad dictum molendinum venire de jure minime teneantur Ego vero et heredes ac successores mei de terra nostra dominicali de Fourgy cum ad dictum molendinum venerimus pro multura vnam ferlotam de celdra tantummodo persoluemus siue terram illam dominicalem in manibus nostris retinuerimus siue eam aliis ad firmam dimiserimus compellemus eciam ego et heredes ac successores mei omnes ad dictum molendinum sectam debentes vt dictum molendinum stagnum ac riuum eiusdem quociens opus fuerit reficiant prout de jure tenentur ac eciam de novo construant secundum eciam quod de jure tenentur cum hoc facere fuerit necesse exceptis tenentibus meis de Arringrosk et de Condolan quos ab huiusmodi onere volo esse liberos et immunes Concedo eciam venientibus ad dictum molendinum et de ipso redeuntibus tam tenentibus meis quam alienis iter liberum et competens in loco magis apto et vicino pro vtilitate ipsorum Donationem autem Henrici de Freslay quondam domini de Fourgy predecessoris mei eisdem religiosis de dicto molendino factam ratam habens tenore presentium et confirmamus in forma premissa literas regie confirmationis sufficientes infra sex menses a tempore date presentium dictis religiosis fideliter me impetraturum obligo subiciens me et heredes ac successores meos jurisdictioni ac cohertioni dominorum archidiaconorum Sancti Andree et Dunblanensis qui pro tempore fuerint vt possint me et heredes ac successores meos vel etiam alter eorum qui super hoc fuerit requisitus compellere per sentencias suspencionis et excommunicacionis monitionibus dumtaxat premissis ad obseruanciam omnium et singulorum premissorum si contra premissa vel aliquod premissorum quod absit venire presumpserimus clam vel palam per nos vel per alios directe vel indirecte et ad hoc renuncio pro me et heredibus ac successoribus meis exceptioni doli mali et pacti conuenti et omni alii exceptioni juris et facti et juris beneficio ac omnibus literis regiis episcopalibus et papalibus impetratis et impetrandis cuiuscunque tenoris existant eciam si de presenti scripto plenam et expressam de verbo ad verbum fecerint mencionem per quod vel quas presens mea donatio impugnari valeat seu diminui quoquo modo Ego vero et heredes ac successores mei singuli dictum molendinum cum terra predicta in forma predicta prefatis abbati et conuentui contra omnes homines warantizabimus et sumptibus nostris et periculo defendemus cum libero aditu et exitu ad dictum molendinum et terram predictam In cuius rei testimonium presentibus sigillum meum apposui et ad maiorem securitatem sigillum reuerendi in Cristo patris domini Willelmi Dei gracia Sancti Andree episcopi presentibus apponi procuraui datum apud Cambuskynneth die Veneris proxima post festum purificationis beate Marie Virginis anno Domini millesimo tricentesimo vicesimo tertio hiis testibus domino Thoma de Haya milite magistro Willelmo de Morauia decretorum doctore Thoma de Balcasky et Johanne filio eius et pluribus aliis