Charter Document - 07280005

Universis presentes literas inspecturis Henricus de Freslay dominus de Fourgy salutem in Domino Cum inter opera caritatis illis potissime quilibet teneatur astrictus a quibus certum est eum beneficia recepisse idcirco ego beneficiorum ac honorum michi ac predecessoribus meis a viris religiosis abbate et conuentu de Cambuskynneth collatorum non immemor in dictorum beneficiorum compensationem et anime mee salutem molendinum de Arryngrosk cum omnibus suis juribus libertatibus aysiamentis et pertinenciis aut in futurum pertinere valentibus quocunque casu vel causa vnacum duabus acris terre dicto molendino adiacentibus in puram liberam et perpetuam elemosinam predictis abbati et conuentui caritatiue confero nulla penitus michi aut heredibus seu successoribus meis juris alicuius seu recognitionis in dicto molendino aut aliquo ad dictum molendinum spectante seu in futurum spectare valente facta reseruatione excepta dumtaxat pensione annua quatuor solidorum sterlingorum monasterio de Culueros debita que a meis predecessoribus in dicto molendino predicto monasterio fuerat assignata sed totum jus quod in dicto molendino habeo in dictos abbatem et conuentum de Cambuskynneth pure transfero omni conditione et modo reiectis Volo eciam et per literas presentes fide super hoc prestita corporali me obligo et heredes ac successores meos quod nullum molendinum de nouo construere valeam aut edificium seu opus quodcunque aliud facere per quod aut occasione cuius vtilitati predictorum religiosorum in aliquo poterit derogari Volo insuper et fide etiam super hoc prestita me et heredes ac successores meos obligo quod si aliqui tenentes mei qui ad dictum molendinum sectam debent a dicto molendino se subtraxerint aut ad dictum molendinum venientes pro multura prout de jure tenentur non satisfecerint quod ego et heredes ac successores mei non venientes ut veniant et non satisfacientes ut satisfaciant quantum districtius poterimus compellamus et distringimus scilicet tenentes meos de Arryngrosk de Conlony de Newtoun vt ad dictum molendinum veniant et pro multura sextum decimum vas de grano sicco et humido persoluant illos autem de Petillocis vt veniant et vicesimum quartum vas pro multura persoluant illos vero de Beyn et de Cathehill ut veniant et pro multura prout tenentur satisfaciant ac illos de Baleward nisi forte illi de Baleward aut eorum dominus docere poterint quare ad dictum molendinum venire de jure minime teneantur Ego vero et heredes ac successores mei de terra quam sumptibus nostris propriis excoluerimus cum ad dictum molendinum venerimus pro multura sexagesimum quartum vas tantummodo persoluemus sed si ad firmam extra manum nostram eam posuerimus ille qui eam in toto vel in parte receperit ad dictum molendinum veniet et pro multura sextum decimum vas persoluet compellamus eciam ego et heredes ac successores mei omnes ad dictum molendinum sectam debentes vt dictum molendinum stagnum ac rivum eiusdem quociens opus fuerit reficiant prout de jure tenentur ac de nouo construant secundum quod eciam de jure tenentur cum hoc facere fuerit necesse subiciens me et heredes ac successores meos jurisdictioni ac cohertioni dominorum archidiaconorum Sancti Andree et Dunblanensis qui pro tempore fuerint ut possint me et heredes ac successores meos vel eciam alter eorum qui super hoc fuerit requisitus compellere per sentencias suspensionis et excommunicationis monitionibus dumtaxat premissis ad obseruanciam omnium et singulorum premissorum si contra premissa vel aliquod premissorum quod absit venire presumpserimus clam vel palam per nos vel per alios directe vel indirecte et ad hoc renuncio pro me et heredibus ac successoribus meis exceptioni doli mali pacti conuenti et omni alii exceptioni juris et facti et omni juris beneficio ac omnibus literis regiis episcopalibus et papalibus impetratis et impetrandis cujuscunque tenoris existant eciam si de presenti scripto plenam et expressam de verbo ad verbum fecerint mentionem per quod vel quas hec presens mea donatio impugnari valeat seu diminui quoquo modo Ego vero et heredes ac successores mei singuli dictum molendinum cum terra predicta in forma predicta prefatis abbati et conuentui coutra omnes homines warantizabimus et sumptibus nostris et periculo defendemus cum libero aditu et exitu ad molendinum predictum et terram predictam In cuius rei testimonium presentibus literis sigillum meum apposui et ad maiorem huius rei euidenciam et securitatem super hac mea donatione de dicto molendino et terra predicta predictis religiosis in forma prescripta facta sigilla predictorum dominorum archidiaconorum Sancti Andree et Dunblanensis presenti scripto apponi procuraui datum apud Cambuskynneth sexto kalendas Augusti anno gracie millesimo ducentesimo nonagesimo quinto