Charter Document - 07260003

Omnibus sancte matris ecclesie filiis ad quos presens scriptum peruenerit Willelmus de Brechine filius domini Henrici de Brechine filii comitis Dauid salutem in domino sempiternam Noueritis me diuine caritatis intuitu et pro salute animarum illustrium regum Scocie dominorum Willelmi et Alexandri domini Johannis comitis Cestrie domini Henrici patris mei et domine Juliane matris mee necnon et pro salute anime mee et animarum omnium predecessorum et successorum meorum nec non et omnium fidelium defunctorum dedisse concessisse et hac presenti carta mea confirmasse Deo et capelle Sancte Marie virginis de Brechine per me fundate et magistro ac capellanis ac pauperibus ibidem deo inperpetuum seruituris in liberam puram et perpetuam elemosinam totam terram in qua capella sita est per rectas diuisas suas videlicet incipiendo a terra Moisy scissoris usque ad quamdam siketam que vocatur Garnech et ab illa siketa versus occidentem usque ad quamdam calceam per quam itur ad Petariam de Brechine et sic versus aquilonem ex occidentali parte ville de Balherquhynn per viam que ducit in moram et inde versus orientem usque ad terram que vocatur Baldouegathy cum medietate illius terre cuius aliam medietatem Walterus Coquus tenet et inde versus austrum usque ad predictam siketam Garnech et inde usque ad riuulum currentem versus orientem ad altam viam que ducit de Brechine versus Kincardine descendendo per eandem viam usque ad villam de Brechine Et insuper molendinum de Brechine cum multura eiusdem ville ad tercium decimum vas de blado ibidem crescente excepto blado meo dominico et heredum meorum quod ibidem libere debet moliri sicut hactenus conuenit et cum multura ville de Lwichlande ad sextum decimum vas cum multura ville de Heychame ad vicesimum vas cum multura terre de Baldougathy que est Walteri Coci ad vicesimum vas cum multura ville de Buthyrkil ad tercium decimum vas cum multura ville de Pettindreich ad tercium decimum vas cum multura terre Moysi scissoris ad vicesimum vas et cum omnibus forinsecis sectis et aliis que ad dictum molendinum pertinent et poterunt pertinere Et si contingat quod dicte terre vel aliqua dictarum terrarum per me vel per aliquem heredum vel successorum meorum quoquo modo inperpetuum vel ad tempus alienentur quod semper multura dictarum terrarum secundum mensuras prius nominatas penes dictam domum sine aliqua diminucione permaneat Volo eciam et concedo pro me et heredibus [meis] quod dictum molendinum et stagnum eiusdem per homines de schira sustententur et impostorum reparentur sicut hactenus dum dictum molendinum fuit in manu mea consueuit fieri Molendinarii vero dicti molendini per magistrum dicte domus et non per alium institui et destitui debent Volo eciam quod dicti magister et homines existentes in dicta domo et omnes homines in eorum terris habitantes a reparacione dictorum stagni et molendini sint immunes Volo insuper quod ubi terre dicte domus sunt contigue adiacentes terris meis quod ab eorum terris habeant communem pasturam inter terram meam eisdem adiacentem Tenendam et habendam predicte domui magistro capellanis ac pauperibus eiusdem domus inperpetuum cum omnibus aisiamentis ad villam de Brechine spectantibus in moris et maresiis in pratis pascuis et communibus pasturis in petariis et in omnibus aliis libertatibus et aisiamentis inter terram meam de Brechine existentibus tam pro seipsis quam pro hominibus suis habitantibus infra diuisas predictas adeo libere quiete plenaria et honorifice sicut aliqua elemosina in regno Scocie a comite vel barone in puram et perpetuam elemosinam data et concessa liberius quiecius plenius et honorificencius tenetur et possidetur Nec volo quod aliquod solvunt racione predictorum nisi tantum preces et oraciones debitas et deuotas et ego Willelmus et heredes mei predictam terram totam et predictum molendinum cum omnibus aisiamentis et pertinenciis suis prout superius plenius continetur predicte domui et magistro capellanis et pauperibus contra omnes homines et feminas warantizabimus inperpetuum acquietabimus et defendemus tam in forinsecis quam in aliis Et sciendum quod cum magister illius domus decesserit vel decesserint alius loco sui per me heredes meos et non per alium episcopo loci qui pro tempore fuerit debet presentari et ad nostram presentacionem ibidem institui Remanente eidem episcopo tantummodo cura spiritualium et obseruato michi et heredibus meis tantum jure patronatus Et magister dicte domus qui ad meam presentacionem vel heredum meorum in eadem fuerit institutus habe bit liberam et generalem administracionem de omnibus rebus mobilibus et immobilibus nunc et impostorum ad dictam domum spectantibus et si quod absit ego vel aliquis ex heredibus meis contra hanc donacionem et concessionem meam in aliquo nunc quam venire presumpserimus volo et concedo quod dictus dominus episcopus contrauenientem sentencia excommunicacionis possit innodare et terras ecclesiastico supponere interdicto quousque ad condignam venerit satisfactionem Ut autem hec mea donacio et concessio robur obtineat perpetue firmitatis presens scriptum sigilli mei munimine roboraui hiis testibus venerabili patre domino Albino episcopo Brechinensi domino Sabino Abbate de Abirbrothok domino Willelmo priore de Rostinoth domino Willelmo decano de Brechine domino Roberto de Montealto domino Johanne Vischarde domino Willelmo de Arrade domino Laurencio de Montealto Thoma rectore ecclesie de Kinros domini pape capellano magistro Ricardo de Logywar Brechinensi canonico Willelmo Chaunteil Duncano judice Johanne Albo Petro de Ferne Symone clerico de Forfar Willelmo constabulario de Brechine