Charter Document - 07250067

Nicolaus episcopus servus servorum Dei venerabili fratri episcopo Dunblanensi salutem et apostolicam benediccionem Ex parte dilectorum filiorum abbatis et conventus Monasterii de Balmurynach ordinis Cisterciensis Sancti Andree dioecesis nobis extitit intimatum quod nonnulli clerici et ecclesiastice persone tam religiose quam seculares in personatibus et dignitatibus constitute necnon comites barones nobiles milites et alii laici Sancti Andree et Brechynensis civitatum et dioecesium qui castra domos villas grangias prata nemora molendina terras possessiones et nonnulla alia bona immobilia sub annuo censu seu redditu a monasterio ipso tenent et possident censum seu redditum hujusmodi dictis abbati et conventui ut tenentur exhibere non curant quamquam iidem clerici comites barones nobiles et laici domos villas possessiones terras et alia bona predicta pacifice possideant et quiete ac fructus cum integritate percipiant eorundem Propter quod dictis abbati et conventui dictoque monasterio non modicum imminet detrimentum Quare iidem abbas et conventus nobis humiliter supplicarunt ut providere sibi super hoc de oportuno remedio dignaremur Quocirca fraternitati tue per apostolica scripta mandamus quatinus si est ita dictos clericos comites barones nobiles milites et laicos quod censum seu redditum memoratos prelibatis abbati et conventui exhibeant integre ut tenentur monicione premisso per censuram ecclesiasticam appellacione remota compellas Proviso ne in terras comitum baronum militum et nobilium predictorum excommunicacionis vel interdicti sentenciam proferas nisi a nobis super hoc mandatum receperis speciale Datum apud Urbem veterem quinto kalendas Junij Pontificatus nostri anno quarto