Charter Document - 07250065

Innocencius episcopus servus servorum Dei dilectis filiis abbati Cistercii ejusque coabbatibus et conventibus universis Cisterciensis ordinis salutem et apostolicam benediccionem Thesauro virtutum sic preclara vestra religio suum semper astrinxit affectum quod habetur et in conspectu Regis eterni placita et in oculis hominum graciosa Ipsa quidem ut columba mitis et humilis et electa Domini specialis pulchra per totum aspicitur omnem a se rugam enormitatis abiciens et maculam deformitatis excludens vigilantibus illis qui paterne sollicitudinis in ea gerunt officium quod ibidem nulle possint viciorum spine succrescere set ipsa florum honoris et fructuum honestatis immarcescibili polleat ubertate Propter hunc etenim sancte operationis effectum nunquam ordo vester officio aliene visitacionis vel correctionis ind ignit set de ipso aliquibus aliis reformacionis beneficium ex providencia sedis apostolice jam pervenit Quum itaque nos qui ex hujusmodi virtuosis actibus spiritu in Domino exultamus claris agnoscamus indiciis dictum ordinem esse aliis recte vite speculum et salutifere conversacionis exemplum quod ipse sicut olim sic et in posterum ab ejusdem duntaxat abbatibus ac monachis idoneis quos vos filii abbates ad hoc provideritis deputandos et a nullo alio visitari possit aut corrigi auctoritate presencium duximus statuendum eadem auctoritate nihilominus decernentes ut si aliquid contra statutum hujusmodi a quoquam propria extiterit temeritate presumptum sit irritum et inane et si forte alique sentencie in vos occasione hujusmodi perlate fuerint nullum robur obtineant firmitatis mandato sedis apostolice semper salvo Nulli ergo omnino hominum liceat hanc paginam nostre constitucionis infringere vel ei ausu temerario contraire Si quis autem hoc attemptare presumpserit indignacionem omnipotentis Dei et beatorum Petri et Pauli apostolorum ejus se noverit incursurum Datum Perusii decimo kalendas Septembris Pontificatus nostri anno decimo