Charter Document - 07230321
| Charter Number: | 07230321 |
|---|---|
| Cartulary Title: | Liber Sancte Thome de Aberbrothoc. Registrorum Abbacie de Aberbrothoc. Pars prior. |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1299 - 1301 |
| Date type: | Assigned |
| Resource Link(s): |
People of Medieval Scotland |
Charter:
Notum sit omnibus fidelibus presens scriptum visuris vel audituris quod nos frater Nycholaus permissione diuina abbas de Aberbrothoc et eiusdem loci conuentus de expresso consensu tocius capituli nostri damus concedimus et presenti carta nostra confirmamus Ricardo filio Cristini filij Lochlani et heredibus suis omnes terras nostras quas habemus in burgo de Strewelin iacentes inter terram Religiosorum virorum abbatis et conuentus de Culros ex parte australi ex parte vna et terram Sancte Marie de Strevelin quam idem Ricardus tenet ad firmam ex parte boreali ex parte altera quas Johannes de Drilaw de nobis iure tenuit hereditario et quas Willelmus filius et heres eiusdem quondam Johannis pro defectu seruicij nobis inde debiti per fustum et baculum in pleno capitulo nostro apud Aberbrothoc sursum reddidit ac pro se et heredibus suis resignauit inperpetuum Tenendas et habendas dicto Ricardo et heredibus suis in liberum burgagium de nobis et successoribus nostris cum omnibus commoditatibus aisiamentis et iustis pertinencijs suis salua nobis iusticia Regalitas et alijs placitis nostris in dictis terris cum voluerimus tenendis Reddendo inde nobis et successoribus nostris dictus Ricardo et heredes sui quatuor solidos et sex denarios argenti ad duos anni terminos medietatem videlicet ad festum pentecostes et aliam medietatem ad festum Sancti Martini in hyeme et inueniendo abbati de Aberbrothoc qui pro tempore fuerit et eius monachis et conuersis et clericis balliuis et attornatis eorundem venientibus pro negocijs et causis monasterij quociens aduenerint singulis secundum statum suum cum familia sua honestum hospicium aulam in qua honeste poterunt comedere cum mensis et testulis et alijs apparatibus spensam cum butellario cameram seu cameras vbi honeste recubare poterunt coquinam honestam et stabulum pro equis ad numerum triginta equorum et infra Inuenient eciam in aduentibus predictis personis sufficienter focale tam in aula et in camera quam in coquina albas candelas de sepo que vulgariter nuncupantur candele de peris lectorium stramentum in aula et camera et sal pro mensis Sed si abbas vel monachi sui clerici aut attornati sui predicti vltra tres noctes continue hospitati fuerint dictus Ricardus aut heredes sui non tenebuntur pro illa vice ad focale et albas candelas sed omnia alia onera subibunt pro mora personarum predictarum et eorum familia Preterea cum nuncij vel cursores abbatis interuenerint ad hospitandum sine contradictione admittentur ad sumptus tamen pro cibarijs suis idem Ricardus et heredes sui non tenebuntur Volumus etiam quod dictus Ricardo et heredes sui leuent firmam nobis debitam de duabus peciis terre quas Thomas Sanser et Willelmus de Kyrcaudi clericus tenent infra terras nostras predictas vna cum pro parte seruicij nobis debiti de eisdem racione hostilagij et nobis de ipsa firma et hostilagio respondeant sicut de firmis et hostilagijs nobis debitis pro alijs terris nostris quas de nobis tenent vt supradictum est Dictus vero Ricardo seu heredes sui nullo modo terras et hostilagia predicta vendent impignorabunt seu alienabant vel ad firmam dimittent alicui persone nisi de consensu predictorum abbatis et conuentus qui pro tempore fuerint In cuius rei testimonium presenti carte commune sigillum capituli nostri concorditer fecimus apponi teste eodem capitulo