Charter Document - 07220018

Omnibus sancte matris ecclesie filijs ad quos presentes litere peruenerint Walterus dictus de Malewyle burgensis de Aberden salutem in domino sempiternam Nouerit vniuersitas vestra me de consensu et assensu Sybille sponse mee caritatis intuitu et pro salute anime mee et dicte Sybille sponse mee et antecessorum et heredum meorum dedisse concessisse et in mea bona memoria ac presenti carta mea confirmasse ministro et fratribus ordinis domus sancte trinitatis et captiuorum de Aberden omnes et singulas terras cum earum reditibus quas emi de Martino Aurifabro de Aberden tam infra villam de Aberden quam extra tenendas et habendas dictas terras et redditus earundem predictis ministro et fratribus in perpetuum ita libere plenaria pacifice et quiete sicut ego predictas terras aliquo tempore liberius quiecius tenui vel possedi Saluo forinseco seruitio domini regis et aliorum dominorum quantum ad illas terras predictas pertinet prout in carta dicti Martini Aurifabri mihi super dictis terris confecta et predictis ministro et fratribus per me deliberata plenius continetur Dedi etiam et concessi fratribus memoratis et eorum successoribus annualem redditum duorum solidorum argenti percipiendorum de illa terra iacente in vico de Fotyn quam Mariota sponsa quondam Willelmi Pistoris tunc tenuit Ita tamen quod minister et fratres predicti pro anima mea et predicte sponse mee antecessorum et heredum meorum inuenient vnum capellanum ydoneum et honestum secularem perpetuo celebrantem in ecclesia sancti Nicholai de Aberden ad magnum altare et soluent singulis annis luminaribus sancte Marie et sancte crucis in dicta ecclesia dimidiam marcam sterlingorum videlicet medietatem ad pentecostes et aliam medietatem ad festum sancti Martini in hyeme de reditibus dictarum terrarum subjiciens me et heredes meos iurisdictioni sedis apostolice et domini episcopi Aberdonensis et eius officialis qui pro tempore fuerint quod possint me de die in diem et heredes meos excommunicare si ego vel heredes mei quod absit contra hanc donationem et concessionem meam venire siue contra dicere presumpserimus Insuper si contingat me vel aliquem heredum meorum contra hanc donationem meam in aliquo contrauenire vel contradicere quod absit volo et concedo quod dominus papa vel sedes apostolica si vacauerit de omnibus alijs terris meis acquisitis penes heredem meum vel heredes meos remanentibus possit vel possint pro sue voluntatis arbitrio libere disponere in subsidium terre sancte conuertendo seu pauperibus erogando Preterea obligo me et heredes meos in penam centum marcarum sterlingorum fabrice ecclesie beate Marie de Aberden persoluendarum si contigerit me vel ipsos vel aliquem per nos vel pro nobis tenorem presentis scripti in aliquo articulo quod absit infringere ita quod dictus dominus episcopus vel sui ordinarij qui pro tempore fuerint tam me quam heredes meos ad solutionem dicte pene quam ad omnia alia in hoc scripto contenta fideliter obseruanda licite possit vel possint compellere et cohercere renunciando in hac parte pro me et heredibus meis omnibus exceptionibus cauillationibus regijs prohibitionibus et cuiuslibet iuris remedio canonici et ciuilis quod nobis contra has literas poterit valere seu competere ad defensionem In cuius rei testimonium sigillum meum vna cum sigillo dicte Sybille sponse mee et cum sigillo officialitatis Aberdonensis et sigillo thesaurarij ecclesie cathedralis Aberdonensis et sigillo domini Johannis de Anand perpetui vicarij de Obyn quondam capellani domini regis presentibus est appensum Testibus Matheo Grethenith Reginaldo de Malewyl fratre predicti Walteri Malcolmo de Polgoueny et multis alijs