Charter Document - 07220015
| Charter Number: | 07220015 |
|---|---|
| Cartulary Title: | Registrum Episcopatus Aberdonensis |
| Charter Language: | Latin |
| Charter Origin: | Lay |
| Charter Type(s): | Confirmation |
| Date: | 1261 |
| Date type: | Internal, A.D., Feast |
| Resource Link(s): |
People of Medieval Scotland |
Charter:
Omnibus hoc scriptum visuris vel audituris Alexander Comyn comes de Buchane tunc iusticiarius Scocie salutem in domino sempiternam Nouerit vniuersitas vestra nos diuine caritatis intuitu et pro salute anime nostre et Isabelle comitisse sponse nostre et pro animabus antecessorum nostrorum et successorum nostrorum dedisse concessisse et hac presenti carta nostra confirmasse sex pauperibus prebendarijs apud nouum burgum in Buchane commorantibus et eorum successoribus ibidem causa elemosine nostre perpetuo commoraturis dimidiam acram terre ad messuagium et curtilegium que iacet inter messuagium capellani versus orientem et portum eiusdem ville qui pro salute nostra et Ysabelle sponse nostre et pro cunctis fidelibus defunctis diuina celebrabit in capella de nouo burgo Tenendam et habendam eisdem pauperibus in puram et perpetuam elemosinam adeo libere et quiete sicut aliqua elemosina in regno Scocie liberius et quiecius conceditur et possidetur et quatuor celdras et quatuordecim bollas farine auene annuatim de firma molendini nostri de Furuy ad eorum sustentationem per manus balliui nostri de Slanys qui pro tempore fuerit percipiendas Concessimus etiam eisdem pauperibus ad eorum vestitum octodecim solidos sterlingorum annuatim ad festum sancti Martini in hyeme percipiendos de firmis ville nostre de nouo burgo per manus prepositorum eiusdem ville Preterea concessimus eisdem pauperibus communem pasturam ad sex vaccas in territorio de nouo burgo annuatim et sufficientem sustentationem in petario eiusdem loci cum libero ingressu et egresso in perpetuum Volumus autem quod cum aliquis predictorum pauperum vniuerse viam carnis ingrediatur alius egenus loco ipsius ad dictam elemosinam nostram percipiendam per nos et heredes nostros substituatur Volumus insuper quod capellanus qui pro tempore apud nouum burgum in capella ibidem constructa pro salute anime nostre et Ysabelle sponse nostre et pro cunctis fidelibus defunctis diuina celebrabit rerum dictorum pauperum eis a nobis concessarum vt saluo et honesto iuxta facultates elemosine nostre eisdem prouideatur generalem habeat administrationem et si circa predictam substitutionem negligentes fuerimus quod absit vel ceteris negocijs in remotis prepedicti hoc adimplere non valentes ne elemosina nostra in numero predictorum pauperum ex mora dispensando protrahatur quod dictus capellanus loco cedentis vel decedentis pauperis alium egenum cuius inopia merito indigeat elemosina sustentari substituat alioquin nobis et heredibus nostris huiusmodi substitutio reseruetur Obligamus etiam nos et heredes nostros necnon et ceteros nostros successores nos et ipsos iurisdictioni episcopi Aberdonensis qui pro tempore fuerit subjiciendo vel vt liceat ei nos et ipsos per censuram ecclesiasticam ad obseruationem dicte elemosine et sustentationem vt dictum est compellere renunciando in hac parte pro nobis et heredibus nostris et ceteris successoribus nostris cuiuslibet iuris remedio per quod dicta elemosina deferri posset aut impediri In cuius rei testimonium huic scripto sigillum nostrum fecimus apponi His testibus domino Ricardo Dei gratia episcopo Aberdonensi domino Willelmo comite de Marre domino Willelmo Comyne milite domino Reginaldum dicto Chene milite Radulpho Laffelis clerico magistro Rogero de Stratheburg tunc officiali Aberdonensi et alijs Actum apud Kelly in Buchan die veneris proxime post festum sancti Mathei apostoli et euangeliste anno gratie millesimo ducentesimo sexagesimo primo