Charter Document - 07220005

Innocentius episcopus seruus seruorum Dei venerabilibus fratribus archiepiscopis et episcopis et dilectis filijs abbatibus et prioribus decanis archidiaconis et alijs ecclesiarum prelatis ad quos presentes litere peruenerint salutem et apostolicam benedictionem Religiosos viros fratres domus Ierosolimitani hospitalis pro religione et honestate sua tanto propensius a malignorum incursibus protegere volumus et tueri quanto puriorem deuotionem circa nos et Romanam ecclesiam habere noscuntur Inde est quod per apostolica scripta vobis precipiendo mandamus quatenus vniuersis parochianis vestris sub interminatione anathematis prohibere curetis ne a prefatis fratribus vel eorum hominibus de victualibus vestimentis pecudibus seu de alijs rebus eorundem fratrum vsibus deputatis pedagium vendam passagium cantagium seu aliam quamlibet consuetudinem exigere vel extorquere presumpserint si qui vero contra prohibitionem nostram venire presumpserint eos a presumptione sua monitione premissa non differatis per excommunicationis sententiam exercere et in terris si quas habent omnia diuina preter baptismum paruulorum et penitentias morientium prohibeatis appellatione remota officia celebrari Super hoc sicut prefati fratres afferunt quidam presbyteri et alij clerici vestre iurisdictionis in ecclesijs illis que pro excessibus in domibus predictorum fratrum commissis sub interdicto tenentur diuina celebrare presumunt eos si res ita se habet a sue presumptionis audacia per suspensionis et excommunicationis sententiam appellatione postposita compescatis Datum Laterani xv Kalendas Marcij anno pontificatus nostri decimo