Charter Document - 07220004

Innocencius seruus seruorum Dei venerabilibus fratribus archiepiscopis et episcopis et dilectis filijs archidiaconis ad quos presentes litere peruenerint salutem et apostolicam benedictionem Cum dilecti filij fratres Ierosolimitani hospitalis nullum habeant episcopum vel prelatum preter Romanum pontificem et speciali prerogatiua gaudeant libertate vos non decet in eos vel clericos aut ecclesias eorum in quibus potestatem ecclesiasticam non habetis absque mandato nostro excommunicationis vel interdicti sententiam promulgare sed si quando vos vel subditos vestros ijdem fratres iniuste grauauerint per vos aut nuncios vestros ad Romanum pontificem significare debetis ac per ipsum de memoratis fratribus iusticiam optinere Inde est quod vniuersitati vestre per apostolica scripta precipiendo mandamus quatinus in predictos fratres seu clericos aut in ecclesias eorum in quibus auctoritatem nequaquam habetis excommunicationis vel interdicti sententiam promulgare nullatenus presumatis nec eos alia indebita vexatione grauetis sed erga ipsos taliter vos habeatis quod non habeant aduersus vos materiam conque repandi scituri quod si mandatum nostrum neglexeritis in hac parte dimittere non poterimus quin eisdem fratribus in sua iusticia si ad nos querelam interim deposuerint efficaciter prouidere curemus Datum Lugduni nono Septembris pontificatus nostri anno sexto