Charter Document - 07190011
| Charter Number: | 07190011 |
|---|---|
| Cartulary Title: | Chronica Regvm Manniae et Insularvm; The Chronicle of Man and the Sudreys. Volume 2. |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1219 |
| Date type: | Internal, Calendar, Papal |
| Resource Link(s): |
People of Medieval Scotland |
Charter:
Honorius Episcopus [] Venerabili fratri [] Episcopo Karleolensi et dilecto filio Pandulph Norwicensi Electo camerario nostro apostolice sedis legato salutem [] Venerabilis frater noster [] Episcopus Insularum in nostra proposuit presentia constitutus quod bone memorie Nicholas Insularum Episcopo predecessore suo viam universe carnis ingresso dilecti filii Conventus de Furnesio ad quos Insularum Episcopi electio pertinebat convenientes in unum invocata spiritus sancti gratia ipsum in episcopum Insularum unanimiter et concorditer elegerunt ac ipsum cum decreto electionis confirmandum ad venerabilem fratrem nostrum [] Dublinensem Archiepiscopum metropolitanum loci legatum sedis apostolice transmiserunt per suas litteras humiliter supplicantes ut electione confirmata ipsius impenderet munus consecrationis eidem qui examinata electione pariter et electo cum ei de idoneitate persone ipsius ac electione canonica constitisset electionem confirmavit eamdem sibi munus consecrationis impendens ac eum ad episcopatum Insularum cum litteris destinavit dans abbatibus prioribus archidiaconis et universo clero Insulane dioecesis in mandatis ut eam tanquam patrem et pastorem animarum suarum recipientes humiliter et devote honorem ac obedientiam sibi debitam exhiberent Princeps autem terre ipsius et quidam alii dioecesis Insulane non attendentes quod laicis quamvis religiosis super ecclesiis vel personis ecclesiasticis nulla est attributa potestas quos obsequendi manet necessitas non auctoritas imperandi ut eum impedirent quominus possessionem ipsius episcopatus obtinere valeret ne ipsum reciperent clero prohibuere prefato alias sibi et ecclesie sue damna gravia et injurias irroganda Quia vero fratrum et coepiscoporum nostrorum gravamen indebitum conniventibus oculis pertransire nec volumus nec debemus discretioni vestre per apostolica scripta mandamus quatenus prefatum principem et alios ut a presumptione hujusmodi desistentes nullatenus per se vel per alios impediant quominus predictus episcopus episcopatus sui pacifica valeat possessione gaudere competenter satisfacientes sibi de damnis et injuriis irrogatis moneatis prudenter et efficaciter inducatis et si necesse fuerit ipsos ad hoc per censuram ecclesiasticam appellatione remota sicut justum fuerit compellatis Non obstante constitutione concilii generalis [] Datum Viterbii v Idus Novembris Pontificatus nostri anno quarto