Charter Document - 07180009

Celestinus episcopus servus servorum Dei Dilectis filiis Abbati de Furnesio et universis fratribus ejus sub ordine Cisterciensi Deo servientibus Salutem et apostolicam benedictionem Sacrosancta romana ecclesia devotos et humiles filios ex assuete pietatis officio diligere propensius consuevit et eos protectionis sue munimine tanquam pia mater est solita confovere quas erga romanam ecclesiam ceteris devotiores existere ac divinis obsequiis noverit adherere Ea propter dilecti in domino filii vestre devotionis sinceritatem quam erga romanam ecclesiam habere noscimini et Cisterciensis ordinis quem geritis religiosum fervorum attendentes vestris justis postulacionibus clementer annuimus et ecclesias de Dalton et de Ursewic cum capellis et omnibus pertinenciis earum et libertatibus cum decimis et obventionibus ad domus vestre paupertatem relevandam et conventum in servitio Dei perpetuo sustentandum vobis auctoritate apostolica confirmamus et presentis scripti patrocinio communimus In quibus liceat vobis presbiteros idoneos nomine vestro ministrantes episcopo presentare qui ei de cura animarum respondeant et secundum consuetudinem provincie jura episcopalia reddant vobis vero decimas et obvenciones fideliter persolvant et securitatem impendant Prohibemus districcius ut nullus episcopus archidiaconus vel decanus aut eorum officiales in ecclesias predictas vel earum ministros excommunicationis vel suspensionis aut interdicti sententiam absque generalis capituli vel synodi judicio et hoc non nisi pro culpis propriis clarescentibus audeat promulgare seu eas tallagiis hospiciis vel aliis aliquibus exactionibus preter quod statutum est in Lateranensi concilio pregravare Si qua vero sententia in prenominatas ecclesias aut earum ministros aliter quam dictum est lata fuerit eam auctoritate presencium decernimus non tenere Si vero episcopus vel alius quilibet officialium ejus aliquid a vobis contra libertatem et consuetudinem ordinis expecierit liberum sit vobis denegare ne tali occasione ordo vester qui hactenus liber exstitit servitutis laqueo vinciatur Quod si episcopus vel ejus officialis propter hoc in vos vel monasterium vestrum sive in servientes vestros aut in sacerdotes nomine vestro in ecclesiis vestris ministrantes aliquam sententiam protulit illam omnino non valere censemus Preterea in eligendo episcopum insularum libertatem quam reges earum bone memorie videlicet Olaws et Godredus filius ejus monasterio vestro contulerunt sicut in autenticis eorum continetur auctoritate vobis apostolica confirmamus Nulli ergo omnino hominum liceat hanc paginam nostre confirmacionis et constitutionis infringere vel ei aliquatenus contraire Si quis autem hoc attemptare presumpserit indignationem Dei omnipotentis et beatorum Petri et Pauli apostolorum ejus se noverit incursurum Data Rome apud Sanctum Petrum x Kalendis Junii Pontificatus nostri anno quarto