Charter Document - 07120198

Eugenius episcopus seruus seruorum Dei dilectis filiis Brieno priori ecclesie beati Andree Rofensis eiusque fratribus tam presentibus quam futuris regularem uitam professis Inperpetuum Ad hoc uniuersalis ecclesie cura nobis a prouisore omnium bonorum Deo commissa est ut religiosas diligamus personas et beneplacentem Deo religionem studeamus modis omnibus propagare Neque enim Deo gratus aliquando famulatus impenditur nisi ex karitatis radice procedens a puritate religionis fuerit conseruatus Oportet igitur omnes Christiane fidei amatores religionem diligere et loca [] uenerabilia cum ipsis personis diuino seruicio mancipatis attentius confouere vt nullis prauorum hominum inquietentur molestiis vel inportunis angariis fatigentur Quapropter dilecti in Domino filii uestris iustis postulationibus clementer annuimus et prefatam beati Andree apostoli ecclesiam in qua diuino mancipati estis obsequio sub beati Petri et nostra protectione suscipimus et presentis scripti priuilegio communimus Statuentes ut quascunque possessiones quecunque bona tam ex dono et concessione bone memorie Lanfranci Anselmi Radulfi Teodbaldi Cantuariensium archiepiscoporum et Gundulfi Rofensis episcopi Willelmi et Henrici Anglorum regum quam aliorum Dei fidelium inpresentiarum iuste et canonice possidetis aut in futurum concessione pontificum liberalitate regum largitione principum oblatione fidelium seu aliis iustis modis prestante Domino poteritis adipisci firma uobis uestrisque successoribus et illibata permaneant Concessionem autem uobis rationabiliter factam ab Ernulfo bone memorie episcopo uestro de sinodalibus denariis et scripti eius pagina confirmatam ratam esse censemus Preterea concordiam que inter uos et uenerabilem fratrem nostrum Ascelinum episcopum uestrum per prefatum Teodbaldum Cantuariensem archiepiscopum de Lamheda Cudintuna et quibusdam aliis possessionibus iuste et canonice facta est ratam et firmam esse decernimus Preposituram quoque ipsius ciuitatis sicut actenus super homines uestros et episcopi et prepositure regis quartam partem racionabiliter habuistis Socam etiam et Sacam tol et tem et infangenetheof ceteras quoque consuetudines et libertates uestras racionabiliter hactenus habitas nihilominus uobis confirmamus Decernimus ergo ut nulli omnino hominum liceat prefatum locum temere perturbare aut eius possessiones auferre vel ablatas retinere minuere seu quibuslibet uexationibus fatigare Sed omnia integra conseruentur eorum quorum gubernatione et sustentacione concessa sunt vsibus omnimodis profutura Salua sedis apostolice auctoritate et dioecesanorum episcoporum canonica iusticia et reuerentia Si qua igitur in futurum ecclesiastica secularisue persona huius nostre constitutionis paginam sciens contra eam temere uenire temptauerit secundo tertioque commonita si non reatum suum congrua satisfactione correxerit potestatis honorisque sui dignitate careat reamque se diuino iudicio existere de perpetrata iniquitate cognoscat et a sacratissimo corpore et sanguine Dei et Domini redemptoris nostri Iesu Christi aliena fiat atque in extremo examine districte ultioni subiaceat Cunctis autem eidem loco sua iura seruantibus sit pax domini nostri Iesu Christi Quatinus et hic fructum bone actionis percipiant et apud districtum iudicem premia eterne pacis inueniant Amen Amen Datus transtiberim per manum Rodberti sancte Romane ecclesie presbiteri cardinalis et cancellarii v kalendas Martii indictione viiii Inca[r]nationis dominice anno MCXLV pontificatus uero domni Eugenii pape iii anno secundo Ego Eugenius catholice ecclesie episcopus subscripsi Ego Conradus Sabinensis episcopus subscripsi et Ego Albericus Hostiensis episcopus subscripsi Ego Ymarus Tusculanus episcopus subscripsi Ego Odo diaconus cardinalis sancti Georgii ad Velum Aureum subscripsi Ego Guido diaconus cardinalis sanctorum Cosme et Damiani subscripsi Ego Octauianus diaconus cardinalis sancti Nicolai in Carcere Tulliano subscripsi Ego Gregorius diaconus cardinalis sancti Angeli subscripsi Ego Berardus diaconus cardinalis sancte Romane ecclesie subscripsi Ego Guido diaconus cardinalis sancte Marie in Porticu subscripsi Ego Gregorius presbiter cardinalis tituli Calixti subscripsi Ego Guido presbiter cardinalis tituli sancti Grisogoni subscripsi Ego Gilbertus indignus sacerdos sancte Romane ecclesie subscripsi Ego Guido presbiter cardinalis tituli sanctorum Laurentii et Damasi subscripsi Ego Bernardus presbiter cardinalis tituli sancti Clementis subscripsi Ego Iordanus presbiter cardinalis tituli sancte Susanne subscripsi Sanctus Paulus Evgenivs papa iii Bene Valete subscripsi