Charter Document - 07120197

Teodbaldus gracia Dei Cantuariensis archiepiscopus et totius Brittanie primas omnibus sancte ecclesie fidelibus salutem Notum vobis esse volo quod omnes donationes et concessiones omnium maneriorum et omnium terrarum et omnium ecclesiarum cum omnibus reditibus et rectitudinibus suis et omnium decimarum qua hactenus concesse et donate fuerunt ecclesie Sancti Andree apostoli que sita est in civitate Rouecestra a quibuscunque sive regibus sive archiepiscopis vel episcopis seu comitibus seu aliis quibuslibet hujus regni nobilibus concesse sint aut donate ego Teodbaldus gracia dei Cantuariensis archiepiscopus et totius Brittannie primas auctoritate michi a deo collata omnimodo ratas et inperpetuum stabiles esse confirmo Et eas nominatim quas Gundulfus illius ecclesie episcopus ut ad usum monachorum illorum qui in eadem ecclesia domino Christo et predicto apostolo devote famulantur permaneant ordinavit ego eidem ecclesie et eisdem monachis jure eterne hereditatis habendas et libere atque quiete confirmo possidendas Et sicut ipse prenominatus episcopus qui ecclesiam illam fundavit et monachos illos illic congregavit et ipsa maneria et terras quas in suo dominico habebat ipsis monachis a suo proprio victu discrevit discretas dedit videlicet Wldeham cum omnibus appenditiis suis Frendesberiam cum omnibus appenditiis suis Stokes cum omnibus appenditiis suis Suthfletum cum omnibus appenditiis suis Danitunam cum omnibus appenditiis suis Lamhetham cum omnibus appenditiis suis Hendenham cum manerio quod appendet Cudintuna nomine et cum omnibus xl hidas terre que appendant et omnes alias minutas terras et omnes redditus omnium terrarum quas suo tempore acquisivit et illis dedit ita firmiter et stabiliter in omnibus omnia ista monachis illis confirmo et corroboro Et sicut beate memorie Anselmus Cantuariensis archiepiscopus et Gundulfus supradicte ecclesie episcopus ista omnia a rege Henrico confirmata confirmaverunt et eidem ecclesie et monachis predictis atque post illos inperpetuum victuris firmiter stabilia et stabiliter firma et illibata permanere sanxerunt et auctoritate dei omnipotentis patris et filii et spiritus sancti et omnium sanctorum ejus omnes illos qui aliquid de regia concessione et illorum institutione vel confirmatione infringerent excommunicaverunt ita et ego tantorum virorum exempla secutus institutiones concessiones et confirmationes et omnia predicta ipsis monachis inperpetuum habenda firmiter stabilio et stabiliter firmo et illibata permanere sancio et sub eadem interminatione omnes qui hanc eorum et nostram confirmationem infirmare vel absque communi fratrum ecclesie illius vel consilio vel consensu immutare presumpserint a liminibus sancte matris ecclesie donec ad satisfactionem congruam veniant ex omnipotentis dei patris et filii et spiritus sancti omniumque sanctorum auctoritate sequestro