Charter Document - 07120175
| Charter Number: | 07120175 |
|---|---|
| Cartulary Title: | Textus Roffensis |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1108 - 1124 |
| Date type: | Assigned |
| Resource Link(s): |
University of Manchester Medieval Collection - Textus Roffensis (p398) |
Charter:
Notum sit omnibus tam posteris quam presentibus quod Gosfridus de Delsa consensu Domini sui et filiorum suorum dedit ecclesie Sancti Andree quandam partem terre sue quam habebat in Delsa cum filio suo quem in eadem ecclesia monachum fecit quam terram ecclesia et monachi tota vita Gosfridi et multo tempore Hereberti heredis sui tenuerunt in pace et sine omni calumnia Orta vero quadam discordia inter monachos et Herbertum ipse Herbertus cepit calumniare partem terre quam pater suus dederat ecclesie dicens monachos plus terre sue quam pater suus eis dedisset usurpasse Propter quam discordiam et calumniam pacandam et in eternum finiendam monachi dederunt ei x solidos et unum palefridum valentem x solidos et ipse clamavit quietam ipsam calumniam pro anima patris sui et sua et uxoris sue ac filiorum suorum ita quod monachi nullum servitium nullam consuetudinem debent facere neque de illa terra que fuit sine calumnia neque de illa de qua mota est calumnia nisi solummodo scotum regis quod vocatur danegeld et tunc tota illa terra defendet se ad ipsum scotum pro xx acris Testibus his Martino monacho cellarario Hunfrido monacho Warnerio monacho Cantuariensi Heruifo archidiacono Rodberto Dofforensi Adelardo Willelmo Coco Hunfrido portario Northmanno Birthtrico de Suthgate et multis aliis