Charter Document - 07032432
| Charter Number: | 07032432 |
|---|---|
| Cartulary Title: | The Register of William Wickwane, Lord Archbishop of York, 1279-1285 |
| Charter Language: | Latin |
| Charter Origin: | Religious |
| Charter Type(s): | Mandate |
| Date: | 1281 |
| Date type: | Internal, A.D., Calendar, Episcopal |
| Resource Link(s): |
Borthwick Institute - Register 3 (f26r) |
Charter:
In Dei nomine Amen Anno Domini MCCLXXX ij nonas Januarii ad regularis salubrem observancie disciplinam et divini cultus augmentum ut dum cure vigilanter intendimus que incumbit crediti vobis talenti fimbrias in Domino dilatare mereamur juxta votum nos W[illelmus] permissione divina Eboracensis [] ad monasterium dilectorum in Christo filiorum prioris et conventus de Munkbrettone nostre dyoecesis personaliter declinantes causa visitacionis paterno affectu exercende in eodem priore ipso et monachis ad mandatum nostrum in capitulo suo hora congrua coram nobis obedientes congregatis sancte visitacionis officium tam in capite quam in membris exercuimus necnon juxta canonica instituta votive complevimus sic debita devocione inchoatum ea que tam in spiritualibus quam in temporalibus correccione digna invenimus vive vocis oraculo eisdem exponentes medicinaliter corrigenda Decernimus itaque ac in virtute sancte obediencie precipimus quatinus correcciones hujusmodi quas ad ipsorum religiosorum uberiorem status reformacionem et fragranciorem religionis odorem duximus injungendas ipsi humiliter admittentes eas exequi salubriter studeant ut tenentur in tantum suum sinceris pectoribus extollentes conatum ut in proxima inibi visitacione nostra honestam conversacionem eorundem floridis pullulare cernamus incrementis pariter et fructiferis ad laudem Unigeniti Filii Dei qui nos misit operari in vinea sua quam elegit Datum in capitulo de Munkbrettone ij nonas Januarii anno Gracie superius annotato et pontificatus nostri secundo