Charter Document - 07031464
| Charter Number: | 07031464 |
|---|---|
| Cartulary Title: | The Register of William Wickwane, Lord Archbishop of York, 1279-1285 |
| Charter Language: | Latin |
| Charter Origin: | Religious |
| Charter Type(s): | Complaint |
| Date: | 1280 |
| Date type: | Internal, A.D., Calendar |
| Resource Link(s): |
Borthwick Institute - Register 3 (f39r) |
Charter:
Reverendo in Christo patri et domino confidenti domino Matheo Dei gracia Sancte Marie in Porticu diacono cardinali suus devotissimus servulus et sacerdos W[illelmus] permissione Ejusdem Eboracensis ecclesie minister humilis Anglie primas salutem et cum sollicita oracionum instancia intimam reverenciam et honorem Pater precordialis et amande scripsi non sine amaritudine et turbacione cordis karissimo et confidenti benivolo meo domino Jordano vestro con cardinali et confratri super quibusdam improperiis et offensis michi immo Deo et sacrosancte Romane et universali ecclesie nuper luctuose et miserabiliter illatis utpote super bajulacione crucis mee per totam Angliam deferende in cujus possessione vel quasi predecessores mei extiterant et Decretalium epistola commemorat quam possessionem vel quasi dominus Cantuariensis nunc perturbare hactenus non cessavit Idem vero dominus Jordanus vobis si placet eadem gravamina vive vocis oraculo sicut sibi supplico referet vice mea Unde dominacioni vestre supplico in visceribus et sanguine Salvatoris quatinus negocium hujusmodi unacum ipso procuretis debite correccioni vel saltem alicujus utilis ordinacionis effectui feliciter mancipari ita quod me et capitulum meum Eboracense vestris exinde beneplacitis artissimos faciatis merito debitores Conservet vos ecclesie et populo suo Deus per tempora longiora Data apud Burton kalendas Aprilis anno gratie MCC octogesimo