Charter Document - 07031451

In nomine Domini Amen Cum juxta canonicas sancciones suspecti et inimici judices esse non debeant ego Willelmus de Fennum clericus procurator venerabilis patris domini R[obertus] Dei gracia Dunelmensis episcopi vos reverende pater domine W[alterus] Dei gracia Dunelmensem Archiepiscopi Anglie primas suspectum postulo et pono et eciam ut suspectum recuso in negocio visitacionis quam exercere intenditis in dictum dominum meum episcopum Dunelmensem capitulum suum civitatem et dyoecesim Dunelmenses pro eo quod cum in causa quam movebat aliquando coram vobis aliquando coram officiali vestro interdum coram commissariis vestris Walterus de Clyfford clericus contra dictum dominum meum episcopum sit ex parte ejusdem episcopi et pro ipso ad sacrosanctam Sedem Apostolicam ex diversis gravaminibus et sufficientibus causis a vobis legitime pluries appellatum Que quidem appellaciones a vobis interposite adhuc pendent indecise quod coram competenti judice vel judicibus seu arbitris divisim me offero probare paratum quatenus michi et domino meo eorum probacio incumbit Et peto quod vos mecum communiter arbitros eligatis vel alio modo in forma juris arbitri eligantur qui de suspicionis hujusmodi causa cognoscant faciant et ordinent quod est justum unde peto domino meo et michi ipsius nomine in omnibus justiciam exhiberi Item quia vos domine archiepiscope Eboracensis Anglie primas dictum dominum meum episcopum et ecclesiam suam Dunelmensem terra et pastura de Redelemer et quibusdam aliis juribus et possessionibus suis spoliastis vel spoliari mandastis seu hujusmodi spoliacionem ratam habuistis vel saltem spoliatori hujusmodi scienter in vicium successistis propter quod ipsius episcopi domini mei et ecclesie sue Dunelmensis inimicus debetis non immerito reputari vos nomine domini mei et pro ipso in predicto visitacionis officio quam exercere intenditis sicut superius est expressum suspectum postulo et pono ac eciam ut suspectum recuso et peto [] Item quia vos domine archiepiscope pendente dilacione hujusmodi visitacionis per vos demandata et post appellaciones predictas a vobis legitime interjectas in causa predicta ut predicitur eidem domino agenti in Cantuariensi provincia in prosecucione suarum appellacionum predictarum per vestras alias postmodum litteras de mandastis ut in predicto crastino Sancti Johannis compareret in capitulo ecclesie sue cathedralis recepturus visitacionem vestram ut superius est expressum eidem inhibentes ne in dicto crastino aliquatenus abesse presumeret sub pena excommunicacionis quam de facto juris ordine pretermisso ex tunc protulistis in ipsum si veniret contra inhibicionem supradictam Per quam sentenciam excepciones et defensiones legitimas domini mei supradicti sibi contra vos et visitacionem vestram sic demandatam competentes subtrahere intenditis minus juste Idemque dominus meus Dunelmensis episcopus senciens se ex hoc per vos indebite pregravari quam cito id ad ejus pervenit noticiam a vobis et a dicta sentencia vestra coram notario publico et testibus fide dignis eo quod vestri presenciam tunc habere nequivit Sedem Apostolicam legitime appellavit Vos pendente hujusmodi appellacione vobis postmodum notificata et coram vobis legitime innovata necnon et subsequenter appellacione ex eadem causa a vobis in vestra presencia nomine domini mei predicti et pro ipso ad dictam Curiam Apostolicam interjecta in dicto visitacionis officio suspectum postulo et pono ac eciam ut suspectum recuso et peto [] Item cum ideo jura sint in medio posita ne quis in sua causa jus sibi dicat vos reverende pater domine archiepiscope Eboracensis suspectum postulo et pono ac eciam ut suspectum recuso pro eo quod vos nitimini vobis jus dicere in visitando dictum dominum meum ecclesiam civitatem et dyoecesim Dunelmenses animadversione penali ut ex terribilibus iniciis et indiciis ac verisimilibus et probabilibus conjecturis apparet cum nec vos nec aliquis predecessorum vestrorum hactenus fecisse vel possessionem vel quasi unquam habuisse hujusmodi exercendi com probemini et dicta ecclesia Dunelmensis in capite et membris a tempore fundacionis ejusdem ab hujusmodi visitacione libera fuerit et immunis et super hiis privilegiis sufficienter sit munita peto [] Predictas recusaciones propono et easdem tempore competenti proponere intendo cum effectu protestans nomine procuratorio me nolle ab eisdem vel earum aliqua recedere quoquo modo quatenus parti domini mei poterunt et debeant suffragari set salvis eisdem protestor me velle loco et tempore compendentibus excepciones proponere infra scriptas non intendens set expresse protestans me nolle per ipsarum proposicionem a recusacionibus supradictis vel earum aliqua recedere quoquo modo Ego Willelmus de Fennum clericus procurator venerabilis patris domini Robertus Dei gracia Dunelmensis episcopi excipiendo propono contra vos reverende pater domine Eboracensis archiepiscope Anglie primas et visitacionem quam facere intenditis in dictum episcopum dominum meum capitulum civitatem et dyoecesim Dunelmenses quod cum in constitucione felicis recordacionis domini Innocencii pape iiij caveatur ut quilibet archiepiscopus suam volens visitare provinciam prius ecclesie sue capitulum ac civitatem et propriam dyoecesim plene visitare procuret ac alia observet que in eadem continentur et deinde liceat ei per totam provinciam vel ejus partem visitacionis officium exercere nec vos capitulum vestrum civitatem vestram et propriam dyoecesim unquam plene prout ad vos pertinet visitaveritis dictusque dominus meus in visitacione et correccione in capitulo suo civitate et dyoecesi negligens non fuerit seu remissus ad visitandum dictum dominum episcopum capitulum civitatem et dyoecesim Dunelmenses etsi vos racione ecclesie vestre in possessione vel quasi essetis episcopatum Dunelmensem visitandi quod non fateor procedere de jure non potestis nec debetis nec vos ad visitacionem hujusmodi admittere tenetur invitus capitulo vestro civitate ac dyoecesi nondum plene prius visitatis ut superius est expressum nec ipsum dominum meum ad visitacionem vestram admittendam invitum compellere de jure potestis seu debetis Item cum ecclesia Dunelmensis et dictus dominus meus Dunelmensis episcopus [et] predecessores sui omnes et singuli illa hactenus fuerit et fuerint gavisi plenaria libertate quod nullo unquam tempore Eboracensis archiepiscopus aut quivis alius suo nomine in episcopum Dunelmensem visitacionis officium excercuerit nec ullo uncquam tempore aliquis Eboracensis archiepiscopus in possessione vel quasi extiterit visitacionis officium in eundem episcopum exercendi set a tempore fundacionis Dunelmensis ecclesie a visitacione hujusmodi sint et fuerint prorsus liberi et immunes et in possessione vel quasi hujusmodi libertatis et immunitatis hactenus pacifice steterint et quieti necnon et super hiis specialibus privilegiis sufficienter muniti que paratus sum tempore debito exhibere coram judice competenti a qua possessione vel quasi de jure non possit nec debeat sine cause cognicione eici vel eciam spoliari Idem dominus meus vos dominum Eboracensem archiepiscopum ad exercendum in ipsum et ecclesiam suam visitacionis officium admittere non tenetur nec vos ipsum propria auctoritate sine legitima discussione ad vestram visitacionem admittendam potestis de jure invitum compellere nec debetis Premissas excepciones recusaciones et raciones propono et protestor ego procurator ad presens divisim seu conjunctim prout michi et domino meo melius videbitur expedire sub premissis vel aliis competentibus per proposicionem alicujus a quacumque alia vel aliis nullatenus excedendo set cuilibet si[n]gillatim cum effectu inherendo de quo protestor expresse non artans me aut dominum meum predictum ad omnium et singulorum probacionem set quatenus de ipsis vel earum aliquibus vel parte alicujus ex ipsis in ista forma vel alia competenti constare poterit eatenus propositum obtineam addendi mutandi [] juris beneficio in omnibus nobis salvo Et ne vos domine archiepiscope Eboracensis vel quivis alius vice seu auctoritate vestra predictum dominum meum episcopum et ecclesiam suam Dunelmensem super possessione sua vel quasi libertatis sue et immunitatis supradicte in qua pacifice steterunt hactenus et quiete ut superius est expressum sine legitima discussione proprio motu contra justiciam molestetis perturbetis seu inquietetis molestet perturbet seu inquietet minus juste ne eciam vos domine archiepiscope Eboracensis vel quivis alius auctoritate vestra spretis non auditis seu non admissis cum effectu recusacionibus excepcionibus et defensionibus supradictis ad visitacionis officium in dominum meum et ecclesiam suam exercendum prout intenditis procedatis seu dominum meum ad vestram visitacionem admittendam compellatis minus juste nomine domini mei predicti et pro ipso Sedem Apostolicam in hiis scriptis provoco et appello et apostolos peto quos si michi de negaveritis iterum appello ut prius Et si ad visitacionis officium exercendum in dominum meum et ecclesiam suam civitatem et dyoecesim Dunelmenses minime ad mittamini sicut nec debetis obstantibus vobis recusacionibus excepcionibus et defensionibus supradictis ne eo pretextu seu occasione sentenciam suspensionis excommunicacionis vel interdicti in predictum dominum et ecclesiam suam civitatem et dyoecesim clericos suos advocatos procuratores aut parochianos ministros et alios sibi adherentes contra justiciam proferatis seu proferri faciatis proferat seu proferri faciat aut quicquid aliud durum vel grave in ipsius domini mei prejudicium statuatis seu eciam statui faciatis statuat seu eciam statui faciat sacrosanctam Sedem Apostolicam nomine domini mei predicti et pro eo denuo in hiis scriptis provoco et appello et apostolos peto quos si michi de negaveritis iterato a vobis provoco et appello supponens dominum meum predictum Dunelmensem episcopum ecclesiam suam Dunelmensem capitulum suum civitatem et dyoecesim Dunelmenses capellam suam familiam suam procuratores suos et ministros necnon et omnes sibi adherentes et suos parochianos statum suum in omnibus loca sua omnia et alia ad que declinaverit necnon et omnia bona sua mobilia et inmobilia ubicumque existencia proteccioni defensioni et tuicioni Sedis Apostolice supradicte