Charter Document - 07030743

Johannes episcopus servus servorum Dei venerabili fratri Bathoniensi et Wellensi episcopo et dilecto filio abbati Westmonasterii Londoniensis [diocesis] salutem et apostolicam benediccionem Laudabilium claritas meritorum quibus karissima in Christo filia Alienor illustris regina Anglie splendere dinoscitur merito nos induxit ut personam ejus in suis familiaribus oportuno tempore honoremus Ut igitur familiares ejus eo sibi obsequantur devocius quo ipsius obtentu votivam a Sede Apostolica graciam consequentur discrecioni vestre per apostolica scripta mandamus quatinus vos vel alter vestrum duobus ydoneis clericis et familiaribus ipsius regine quos ipsa vobis duxerit nominandos uni eorum in Eboracensi et alteri in Saresbyriensi ecclesiis de prebendis si vacant ad presens vel quamprimum ad id optulerit se facultas utrique videlicet eorum de una prebenda dumtaxat auctoritate nostra per vos vel alium aut alios providere curetis facientes exnunc unum illorum in una et alterum in alia de predictis ecclesiis sicut regina ipsa petiverit in canonicos recipi et in fratres non obstantibus contrariis consuetudinibus vel statutis seu certo canonicorum numero ecclesiarum ipsarum juramento vel confirmacione apostolica seu quacumque firmitate vallatis vel si dicti duo clerici aut alter eorum beneficiati existant aut si aliqui super recepcione et provisione sua in eisdem ecclesiis nostras aut predecessorum nostrorum Romanorum pontificum sive legatorum Sedis Apostolice litteras inpetrarunt et earum sint ibidem auctoritate recepti vel quod recipiantur insistant quibus per hoc nullum prejudicium generetur vel si venerabilibus fratribus nostris archiepiscopo Eboracensi et episcopo Saresbyriensi et capitulis ecclesiarum ipsarum communiter vel divisim a Sede sit ipsa indultum quod ad recepcionem et provisionem alicujus minime teneantur et ad id compelli seu interdici suspendi et excommunicari non possint et quod alius de prebendis et beneficiis ad eorum collacionem conjunctim aut separatim spectantibus cuiquam nequeat auctoritate apostolica providere sine quibuscumque privilegiis aut indulgenciis dicte Sedis per que presentibus non expressa aut totaliter non inserta effectus hujusmodi gracie inpediri valeat vel deferri et de quibus quorumque totis tenoribus de verbo ad verbum in ipsis litteris fieri debeat mencio specialis contradictores auctoritate nostra appellacione postposita compescendo Has autem litteras extendi volumus ad prebendas que apud Sedem Apostolicam vacaverint hactenus vel vacabunt Data Viterbi x kalendas Aprilis pontificatus nostri anno primo