Charter Document - 07030740

Nicholaus episcopus [] venerabili fratri Willelmo archiepiscopo Eboracensi [] De variis innumerisque negociis jugiter emergentibus ex multarum inopinabilium diversitate causarum continua reddimur at tensione solliciti et profundis circa illa vigiliis excitamur ne desit apostolice solicitudinis studium ubi pastorale tenemur injunctum nobis officium exercere sed in eo potissime studiorum nostrorum sedulitas officiosa versatur ut ad curam ecclesiarum omnium quarum licet inmeriti regimini presidemus et earum maxime quas viduitatis incomoda deplorare conspicimus oportunam sollerciam et sollertem diligenciam inpendentes studeamus eas preficere viros ydoneos in pastores Sane dudum Ebo acensis ecclesia per obitum bone memorie Walteri Eboracensis archiepiscopi solacio destituta pastoris dilecti filii capitulum ipsius ecclesie a carissimo in Christo filio nostro rege Anglie illustri prout de consuetudine fore asseritur hactenus observatum eligendi petita licencia et optenta vocatisque omnibus qui voluerunt debuerunt et potuerunt commode interesse certa quoque die ad eligendum prefixa in simul convenerunt et ad eleccionem hujusmodi per viam scrutinii procedentes cum essent viginti et unus numero tum per se tum per procuratores tres scrutatores ordinarunt ex eis qui vota sua et aliorum eciam scrutarentur Quibus vota ipsa scrutantibus et mox Publi cantibus in communi compertum est quod decem et octo ex eis inte et tu in magistrum Hugonem de Evesham ipsius ecclesie canonicum consensistis et magister Robertus archidiaconus Estridinge in eadem ecclesia in magistrum Thomam archidiaconum Eboracensem tunc presentem et magister Thomas de Hedone Eboracensis canonicus in magistrum Thomam de Correbrigge ecclesie prefate canonicum tunc absentem direxerant vota sua Et tandem eisdem archidiaconis ac Thoma de Hedone qui dictum Thomam de Correbrigge tunc absentem ut predicitur nominaverat ad alios qui in te consenserant accedentibus dictus Robertus nulla collucione habita de mandato et vice omnium aliorum predictorum ac sua elegit te in Eboracensem archiepiscopum et pastorem presentataque nobis eleccione hujusmodi taliter de te facta et procuratoribus dicti capituli ac eodem Thoma de Corbrigge illam petentibus confirmari eleccionem eandem per venerabilem fratrem Bralliavensem episcopum et dilectos filios nostros Guillelmo tituli Sancti Marci presbiterum et Matthaeus Sancte Marie in Porticu diaconum cardinales juxta modum quem in hoc Romana servat ecclesia examinari fecimus diligenter Et quia omnis collacio in dicta eleccione reperiebatur omissa predictam eleccionem non vicio persone cassavimus set justicia exigente et postmodum specialis caritatis affectum quem ad prefatam ecclesiam a nostris quasi primordiis gessimus et quo illam continua rememoracione prosequimur infra nostra precordia revolventes et de ipsius provisione utili et salubri ne prolixioris dispendia vacacionis incurreret cogitantes et ad personam tuam quam odor fame nobis reddit acceptam cum habearis vir vite laudabilis et conversacionis honeste litterarum sciencia preditus discrecionis maturitate conspicuus preclarus meritis et alias in spiritualibus et temporalibus circumspectus nostrum dirigentes affectum sperantes quoque quod virtutibus desursum tibi traditis insignitus eandem ecclesiam salubri dante Domino regimine gubernabis ipsaque utilis presidio munita pastoris optatis affluet incrementis te tunc cancellarium ecclesie memorate de fratrum nostrorum consilio et apostolice plenitudine potestatis eidem ecclesie preficimus in archiepiscopum et pastorem tibique munus consecracionis de nostris manibus duximus inpendendum Quocirca fraternitati tue per apostolica scripta mandamus quatinus inpositum tibi onus a Domino devote suscipiens sic curam et administracionem prefate Eboracensis ecclesie diligenter gerere studeas et salubriter ac utiliter prosequaris quod ipsa sub tua vigilancia votivis amplietur commodis et in omnibus divina cooperante clemencia prospere dirigatur tuque nostram et dicte Sedis graciam exinde tanquam benediccionis et obediencie filius uberius consequi merearis Datum Viterbii xiii kalendas Octobri pontificatus nostri anno secundo