Charter Document - 07030725
| Charter Number: | 07030725 |
|---|---|
| Cartulary Title: | The Register of William Wickwane, Lord Archbishop of York, 1279-1285 |
| Charter Language: | Latin |
| Charter Origin: | Religious |
| Charter Type(s): | Order |
| Date: | 1284 |
| Date type: | Internal, A.D., Calendar, Episcopal |
| Resource Link(s): |
Borthwick Institute - Register 3 (f80v) |
Charter:
Universis sancte matris ecclesie filiis ad quorum noticiam pervenerit hec scriptura Willelmus permissione divina Ebor Archiepiscopo Anglie primas salutem in sinceris amplexibus Salvatoris Subditorum nostrorum profectibus addicere salubriter estimamus dum jurgiorum discrimina que ceca cupiditas mater inproba parturit cotidie et producit sollicite tollimus et dissutas ecclesias ad statum debitum reducere provide laboramus Cum itaque dilecti in Christo filii S[imon] abbas et conventus monasterii Beate Marie Eboracensis patroni ecclesie de Kyrkeby Mispertone ac magister Radulphus de Wyten vicarius ecclesie ejusdem nostre dyoecesis controversie diucius habite inter eos super vicaria ipsa cujus possessioni idem Radulphus tanquam verus vicarius incumbit totaliter renunciantes se nostre ordinacioni in hac parte pure et simpliciter submiserunt prout series submissionis partis declarat evidencius utriusque Nos pensatis deliberacius singulis que contingunt sic demum duximus ordinandum In Dei nomine Amen Ut tam tranquillitati parcium predictarum quam utilitati prefate ecclesie equo intuitu consulamus ordinamus et decernimus et hujus scripti testimonio diffinimus quod quandocumque videlicet prefatam ecclesiam de Kyrkeby Mispertone per mortem cessionem amocionem vel privacionem canonicam Johannis de Colcestre nunc rectoris ejusdem vacare contigerit vicaria ipsa cum rectoria ejusdem ecclesie consolidetur integre per liberam resignacionem juris et possessionis vicarii antedicti quam sic ex hac nostra ordinacione libere resignabit ita quod ex tunc unum sit beneficium sub unici rectoris regimine gubernandum Idem autem vicarius predicte vicarie sue gratis renuncians ne ex liberalitate sua commoda afficiatur incommodo minus grate ex tunc a prefatis abbate et conventu percipiat annis singulis decem marcas sterlingorum in festis Pentecostes et Beati Martini in hyeme eidem pro equalibus porcionibus in monasterio predictorum abbatis et conventus Eboracensium solvendas nomine pensionis donec iidem abbas et conventus predicto Radulpho vicario providerint de ecclesiastico beneficio estimacionis xx librarum annuatim quod in rectoria consistat Quam quidem annuam pensionem idem vicarius integre percipiat annuatim donec de hujusmodi beneficio sibi provisum fuerit cum effectu Ad quod faciendum prefati abbas et conventus prefato magistro Radulpho se obligent per suas patentes litteras que ut expressimus hec fideliter comprehendant In cujus ordinacionis nostre testimonium hoc instrumentum bipartitum cujus una pars penes predictos abbatem et conventum et alia penes prefatum magistrum Radulphum residet sigilli nostri munimine fecimus roborari salva nostra et ecclesie nostre Eboracensis in premissis omnibus dignitate Datum apud Wiltone v kalendas Marcii Anno gracie MCC octogesimo tercio et pontificatus nostri anno quinto