Charter Document - 07030724

Willelmus permissione divina Ebor Archiepiscopo Anglie primas Dilectis in Christo filiis presidentibus ac ceteris prioribus et canonicis ordinis Sancti Augustini nostre dyoecesis et provincie in hoc generali capitulo congregatis Inter cetera quorum cura nos urget illa plerumque meditacio mentem nostram occupat illa nos votiva sollicitudo fatigat ut religiose conversacionis vestre honestas quam pio sinui amplectimur per nostre deliberacionis consilium sic salubriter augeatur quod apud vos multiplicate devocionis iniciata sinceritas commissis vobis collegiis in presenti proficiat et posteris floridis pullulare incrementis Et quidem dum conformem devocionem inprimere cupimus deformitatis materiam necessarium censuimus amputare Que itaque apud regulares deformitas probrosior quam inter eos qui ejusdem se asserunt religionis cultores diversorum rituum singulares observancias confovere Nunquam religiose condicioni congruit quod dum pars professionis licet diversorum cenobiorum canonici nonnunquam conveniunt in horis canonialibus exsolvendis varia senciunt et hic suum cum socium non intelligat alterius abusui ridiculose proponit Nunquam religiose y[n]demnitati convenit quod tam nuncupacione regulari dum hic videlicet dominus alius vero frater appellatur quam in calciamentorum pompositate dum equitant acceptatur disparitas apud eos Profecto quanta ex hiis ordini scandala proveniant quantaque obprobria subsequantur facillime attendere poterit oculus animi sagaciter intuentis Horum proinde consideracio nostrum interpellat affectum ut nos qui hoc dudum attenta meditacione pensantes operosum adhibuimus studium ut uniformitatem debitam quo ad premissas disparitates solide pararemus non desistamus acceptis set reddamus vos paterna monicione solicitos quatinus in hoc generali capitulo vestro sic prospere agatis pro viribus quod inter se vota vestra non discrepent set vicaria promptitudine quasi in unum alveum congesta ad reparacionem premissorum conveniant concorditer et subsistant Usuum igitur diversitates apud vos hactenus reprobe acceptatas ad unicum usum compendiosum in hac vestra congregacione studiosius redigatis Et quia usum ecclesie nostre Eboracensis communiter credimus convenire usum ipsum in singulis conventibus vestris statuatis decetero observandum alias disparitates quaslibet quibus hucusque non sine ordinis vestri vituperio adhesistis ad pares observancias per singula circumspeccius revocantes Ex hoc siquidem ordinis reverencia augebitur et concors adicietur familiaritas ac futuris temporibus placida inter fratres Si qui vero huic commode provisioni nostre duxerint resistendum inprobe nos ad denunciacionem presidencium quibus hoc firmiter injungimus eorum conatus demeritos curabimus disponente Domino prompcius refrenare Valete Datum apud Burtone Kalendas Maii pontificatus nostri anno tercio