Charter Document - 07030721
| Charter Number: | 07030721 |
|---|---|
| Cartulary Title: | The Register of William Wickwane, Lord Archbishop of York, 1279-1285 |
| Charter Language: | Latin |
| Charter Origin: | Religious |
| Charter Type(s): | Transfer |
| Date: | 1284 |
| Date type: | Internal, A.D., Calendar, Episcopal |
| Resource Link(s): |
Borthwick Institute - Register 3 (f79v) |
Charter:
Universis sancte matris ecclesie filiis ad quos presentes littere pervenerint Willelmus permissione divina Ebor Archiepiscopo Anglie primas salutem in sanctis amplexibus Salvatoris Assidue devocionis integritas qua religioni et Deo dedicate filie priorissa et moniales de Molseby nostre dyoecesis divinis obsequiis honeste conversando vigilanter intendunt et necessariorum pro victu extrema qua eas premi cernimus inopia nos alliciunt in caritatis visceribus et inducunt ut earum egestati sic studeamus prospicere quod erga divinum clericum ipsarum devocio fervencius augeatur cui deinceps tam religiosius quam quiecius famulentur Cum igitur eedem priorissa et moniales capellam de Queneby nostre dyoecesis sui patronatus vacantem cum suis juribus et pertinenciis nostre ordinacioni pure et absolute submiserint prout patentes littere predictarum priorisse et monialium super hoc confecte evidencius manifestant nos illarum profectibus pio demum intuitu providere curantes re ipsa primitus subjecta oculis de prefata capella sic duximus ordinandum In Dei nomine Amen Ad submissionem predictarum priorisse et monialium capellam ipsam de Queneby eis et monasterio suo appropriamus et in proprios usus auctoritate ordinaria per decretum canonicum assignamus reservata nobis potestate ordinandi et constituendi competentem vicariam et perpetuam in eadem Ut autem inter predictas priorissam et moniales et vicarium per nos ordinandum et inibi instituendum ac successores suos dissensionis et scandali materiam perpetuis temporibus penitus amputemus facultatibus et proventibus ipsius capelle de Queneby consulcius ponderatis ordinamus et solicite revolventes disponimus in hunc modum videlicet quod prefate priorisse et moniales de Molseby nomine appropriacionis nostre predicte et personatus habeant omnes decimas garbarum ad dictam capellam de Queneby pertinentes de terris nunc in culturam redactis et in posterum redigendis et unam bovata terre de tribus bovatas que sunt de dote capelle ejusdem cum feno ad dictam bovatim totaliter pertinente quibus nomine personatus et appropriacionis nostre eas volumus perpetuo fore contentas Vicarii vero in capella ipsa per nos et successores nostros instituendi habeant ex hac nostra ordinacione integrum mansum rectorie cum duabus bovatas terre residuis et feno ad easdem eciam pertinente ita quod de duabus bovatas terre cum feno ad vicariam pertinentibus nulla per priorissam et moniales a vicariis nec per vicarios a priorissa et monialibus de bovata terre cum feno eis appropriata seu de nutrimentis propriorum animalium ipsarum priorisse et monialium ibidem decima exigatur quinimmo porcio priorisse et monialium eis sit libera et porcio vicarii libera sibi sit a prestacione decime hinc et inde Habebunt eciam vicarii decimam feni lane et agnorum vitulorum porcellorum columbarum aucarum gallinarum pullorum apum ortorum molendinorum albi lini et cannabi et omnes oblaciones majores et minores et mortuaria cum denariis carrucarum et ciragiorum et omnes proventus alios quoscumque exceptis distinctis porcionibus priorisse et monialium superius assignatis Priorissa quidem et moniales predicte singulis vicariis qui pro tempore ibidem fuerint quatuor marcas sterlingorum in festis Sancti Martini in yeme et Pentecostes per equales porciones persolvent nihilominus nomine annue et perpetue pensionis Et predicti vicarii omnia onera ordinaria perpetuo sub portabunt libros et ornamenta ecclesie sustentabunt et reparabunt et onus cancelli construendi seu reparandi quociens opus fuerit sustinebunt Predicte autem priorissa et moniales ac predicti vicarii instituendi de oneribus extraordinariis pro rata porcionum suarum videlicet priorissa et moniales pro duabus partibus et vicarii pro tercia juxta taxacionem Norvicensem perpetuis temporibus respondebunt Cujus vicarie collacio nobis et successoribus nostris Eboracensibus archiepiscopis reservamus et pertinendum seu spectandam ad provisionem nostram et successorum nostrorum in perpetuum tenore presencium ordinamus Predictam vero ordinacionem nostram ratam perpetuo et firmam esse volumus salva nostra et ecclesie nostre Eboracensis semper in omnibus dignitate In quorum fidem et testimonium sigillum nostrum presentibus est appensum Datum apud Wiltone viii Kalendas Februarii Anno gratie MCC octogesimo tercio pontificatus nostri anno quinto