Charter Document - 07030720

Universis sancte matris ecclesie filiis ad quorum noticiam pervenerit hec scriptura Willelmus permissione divina [] salutem in sinceris affectibus Salvatoris Assumpti officii vigilans solicitudo nos caritativis indiciis exortatur ut de personis religiosis que divine cultui vacant jugiter precipue meditantes eas speciali favore et gracia prosequamur Intuentes itaque regularis observancie honestatem in qua dilecti in Christo filii prior et conventus de Wyrkesoppe nostre dyoecesis Deo commendabiliter famulantur advertentes eciam quod iidem religiosi hospitibus liberales se exhibent ac pauperibus pro suo modulo gratanter subveniunt et egenis propterque eciam alias necessitates multiplices multa eis subire oportet nonnunquam onera expensarum religiosis ipsis paternis vi[s]ceribus in hac parte providere censuimus ut hujusmodi onera in futurum valeant commodius supportare Super medietate igitur ecclesie de Wa[l]keringham nostre dyoecesis ad supradictorum prioris et conventus patronatus spectante quam medietatem Willelmus de Hameltone cum toto alteragio tocius parochie de Walkringham possedit ultimo tanquam rector quo ad piam et meritoriam appropriacionem ipsius necnon quo ad constitucionem competentis vicarie in eadem ecclesia totali postquam rem et ecclesiam ipsam oculorum visui subici fecimus sic zelo caritatis intime demum duximus ordinandum In Dei nomine Amen Ad curam et spontaneam submissionem antedictorum prioris et conventus de Wyrkesop qui prefatam medietatem cum suis pertinenciis et unam bovata terre de dominico suo que continet xxvij acras que jacent in campis ville de Walkringham ut inferius subicitur nostre ordinacioni simpliciter submiserunt eisdem priori et conventui et successoribus suis predictam medietatem ecclesie de Walkringham appropriamus et in proprios et perpetuos eorundem usus auctoritate ordinaria per decretum canonicum assignamus [salva] perpetuis vicariis successive per nos et successores nostros ad presentacionem eorundem prioris et conventus inibi instituendis de bonis ecclesie ejusdem et aliis que in nostram ordinacionem veniunt congrua porcione Ut autem inter eosdem religiosos et vicarios successive instituendos discencionis et scandali materiam perpetuis temporibus penitus amputemus ponderatis circumspeccius facultatibus et proventibus ipsius medietatis quam prefatus Willelmus de Hameltone cum toto alteragio tocius parochie de Walkringham possedit ut premisimus de fide dignorum nobis assistencium consilio ordinamus et disponimus in hunc modum videlicet quod prefati prior et canonici de Wyrkesop nostre dyoecesis nomine appropriacionis et personatus habeant et recipiant omnes decimas garbarum ad medietatem ipsam pertinentes excepta decima viginti trium acrarum terre arabilis que sunt de dote medietatis ejusdem et excepta decima unius bovata terre que continet viginti et septem acras que porcioni vicariorum per nos et successores nostros ad presentacionem predictorum prioris et conventus ibi instituendorum inferius assignantur qua porcione religiosos nomine appropriacionis hujusmodi volumus esse contentos Perpetui vero vicarii in totali ecclesia ipsa de Walkringham per nos et successores nostros ad presentacionem predictorum religiosorum successive instituendi habeant totum mansum integrum quod rectores illius medietatis hactenus habere consueverant cum viginti tribus acris terre arabilis et quinque rodis prati que sunt de dote medietatis ejusdem Habeant eciam vicarii ipsi unam bovata terre arabilis de dominico predictorum religiosorum cum suis pertinenciis que continet viginti septem acras terre que situatur in campis ville de Walkringham ut distinguntur inferius Ecce statim de illis scilicet viginti et septem acris et cetera Quod quidem mansum cum predictis viginti tribus acris terre arabilis et quinque rodis de dote et una bovata predicta que continet viginti septem acras ut premittitur habeant vicarii ipsi cum suis pertinenciis universis scilicet cum edificiis annuis reditibus tenentibus pratis pascuis et pasturis et aliis pertinenciis quibuscumque de quibus predictis quinquaginta acris priori et conventui decimam non prestabunt Habeant eciam iidem vicarii totam decimam feni predicte medietatis et totum alteragium tocius parochie de Walkringtone absque diminucione qualibet et omnes minutas decimas parochie ejusdem quocumque nomine censeantur exceptis decimis de nutrimentis propriorum animalium et ortorum predictorum prioris et conventus in manerio suo ibidem Si idem vero vicarius predicte ecclesie per se et alios ministros sufficientes in debito et consueto numero idonee deserviat et honeste in libris eciam et ornamentis competentibus ecclesie quociens opus fuerit provideant Inveniant in eadem luminaria consueta Archidiaconi loci de procuracionibus respondeant et alia onera ordinaria sustineant universa Onus autem cancella construende erigende seu reficiende ad priorem et conventum pro tribus partibus et vicarium pro quarta parte subeant quociens emerserint et subportent In premissorum vero testimonium hoc instrumentum bipartitum cujus una pars penes predictos priorem et conventum et altera pars penes vicarium residet sigilli nostri munimine fecimus roborari Datum apud Wiltone viii Kalendas Marcii Anno gratie MCC octogesimo tercio et pontificatus nostri anno quinto