Charter Document - 07030718

Venerabili viro confratrique karissimo domino Bogo de Clara Henricus decanus et capitulum Eboracense salutem et fraterne dileccionis augmentum Urget fraterna caritas quam erga vos gerimus evidens exposcit utilitas extrema necessitasque compellit ut ministrorum vestrorum thesauri nostri positorum custodie ne vestros dicamus defectus quos intolerabiliter [ob vestri reverenciam] toleravimus hactenus ante vestros oculos notabiliter reducamus Hec quidem Apostolorum principis basilica que inter sancte Romane ecclesie filias quasi nobilissima reputatur jam una de ca[nonicis] precipuis que vestris injicitur humeris [solito] fulcimento frustrata sub tali in []ulro ruina respicit decorem abicit [absque verecundia tanti collegii] []a Christicolis anxie eversus plangitur vultus ejus Nec mirum quippe si ovis neglecta pereat a qua dumtaxat requiritur lac et lana juxta illud canonicum dum que nostra sunt querimus videmur negligere que sunt Christi Hec tamen sub silencio pertransimus pro eo quod vestris ministris forsitan tam commissa quam omissa ascribi poterunt judicio aliquorum quibus id jure [profecte] obviat quo cavetur quod culpa non ca[] qui opera utitur perversorum set ut compendiosius realitas se ostendat pro speculo subicimus infrascripta Vestimenta siquidem [ecclesie] cum capis sericis et aliis nec fracta turribula prout convenit reparantur Incensum cera et cerei deficiunt temporibus oportunis Campane in campanili minus legitimel locate cardas non habent nec est orologium ecclesie sub debito regimine custoditum [Fenum et juncci et herba more solito non prestantur] Illi eciam qui sub thesaurum nunc gerit suisque ministris consueta stipendia subtrahuntur Libri ecclesie custodia carentes debita quatenus indigent minime reparantur Item palle et ornamenta ecclesie que certis anni temporibus appendentur parietibus ad honorem custodiuntur pessime adeo quod culcitris de serico que ad ornamentum similiter deputantur custos vester in lecto suo et hospicio tam Eboraci quam in remotis alibi quod detestabile cernitur est abusus Item ejusdem vestri custodis ministri ornamenta ecclesie et alia que ad cultum ecclesie deputantur mulieribus in puerperio decubantibus illisque nubentibus ad suos ornandos thalamos satis lascivo libito tradiderunt Item iidem nocturno tempore exierunt ecclesiam contra sacramentum prestitum clavibus ecclesie sine custodia derelictis Item inter se pacem vestri non habent ministri quinimmo ita conflixerunt adinvicem in domo thesauraria [hoc] Sabbato Sancto Pasces quod [in ipsis] maximum scandalum patiebatur ecclesia et extitit civitas tota mota quod est [procul dubio] nimis notum Nec est silendum quod ob ipsorum ministrorum defectum ut de protervia taceamus [ex cogitato] predonum incursu debuit aliquando ecclesia spoliari Et ut in summa brevibus concludamus omnia onera consueta et debita ad thesaurarium pertinencia penitus contempnuntur An in eterne salutis dispendium discutiat intelligens et attendat Preterea prefati ministri in contribucionibus ordinariis et extraordinariis quibuscumque ecclesie onera non agnoscunt et si fructus thesauraria propter hoc per capitulum sequestrentur sequestra hujusmodi effrontes violant contempnendo Poscimus itaque quatinus premissa mente pensantes sollicita ea faciatis [vane promissionis morositate suspensa] cum celeritate congrua efficaciter emendari alioquin dissimulare nolumus sicut nec possumus quin in proximo domini nostri regis adventu cujus interest quod sui patronatus ecclesia statutis non fraudetur obsequiis ei prescripta singula et alia revelacione veridica revelemus In prosperis jugiter valeatis